操盤手劄記│準備面對衰退衝擊（割柑人）
操盤手劄記│準備面對衰退衝擊（割柑人）
市場擔心經濟衰退，資金湧入債市避險，價升息跌。
踏入7月，亦即踏入下半年同第三季，七一香港打風，環球金融市場亦似醞釀風暴，投資者喺憧憬「七翻身」之餘，亦要做好風險管理。市場擔心經濟衰退，資金湧入債市避險，
價升息跌。繼上周四跌穿3厘後，美國10年期債息上周五一度跌穿2.8厘，收2.889厘；美滙指數重上105關，收105.12；美股先跌後升，三大指數收升0.9%至1.1%。EPFR Global數據顯示，上周股、債、金市場都見走資，美銀促投資者應準備面對衰退衝擊。
美股、外匯、加密貨幣免費即時報價，自選投資組合獲取相關新聞提示。
預警美國經濟衰退嘅「預言家」，名單愈嚟愈長，包括：美國前財長Lawrence Summers、前聯儲局副主席Alan Blinder、費城聯儲行長Patrick Harker、前費城聯儲行長Charles Plosser、前里士滿聯儲行長Jeffrey Lacker、前紐約聯儲行長William Dudley；經濟學家如聯儲局「自己友」Michael Kiley、「末日博士」魯賓尼（Nouriel Roubini）；大行如野村、大摩、摩通、高盛、德銀、美銀；企業老闆如Tesla CEO Elon Musk、Meta CEO Mark Zuckerberg等。
美國面臨技術性衰退
事實上，聯儲局主席鮑威爾早前都話：「衰退係有可能」，雖然隔日又話：「衰退並非不可避免」。孰真孰假？美國上周三公布，首季GDP終值為收縮1.6%，若次季又收縮，連續兩季負增長，就意味上半年或已步入衰退；而亞特蘭大聯儲銀行GDPNow估算，次季GDP將收縮2.1%。係咪衰退要等數據，但金融市場往往提前發出衰退訊號，美股一般喺衰退前6個月見頂，美債孳息倒掛（2年期同10年期）平均早過衰退13.6個月。
通脹、加息、滯脹、衰退仿如夢魘，不斷縈繞市場。現時市況睇嚟，市場驚衰退多過驚滯脹。今個月重頭戲，除咗美國聯儲局議息，仲有美股業績期，股價其實已在price in衰退預期，大行似想睇埋業績再revise downward。不過，美股戰友又唔使太悲觀，一旦經濟數據印證聯儲局重手加息遏抑通脹引發衰退，咁今季尾至下季，有機會開始炒明年息口見頂。
中銀利率敏感度較高
港股方面，七一回歸假期前，恒指連跌兩日，回補上升裂口，收21859，短期唔排除繼續回調，初步支持睇10天、20天、100天線滙聚嘅21600水平，下一步睇上升軌支持21200水平，整固過後，有望延續5月以嚟嘅升勢。港股目前主要阻力嚟自「股王」騰訊（700），因其大股東Naspers反口減持，兼係無上限沽貨，以Naspers透過Prosus持有27.69億股（28.82%）計，按騰訊過去一年日均成交2,685萬股，若每日減持佔成交5%，需時逾8年才能清倉。
美國大幅加息，香港銀行同業拆息（HIBOR）隨之上升，本港銀行息差擴闊，利好盈利增長。滙豐研究指出，本港銀行盈利對HIBOR最初上升100基點特別敏感。而本港銀行中，中銀香港（2388）對利率上升敏感度較高。據彭博綜合券商預測，中銀2022至2023年盈利將恢復增長，分別按年增16%同22%。大行目標價平均約36元，該股現價31元，要注意係，該股今日（7月4日）除淨。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
