操盤手劄記│中槪股退市鳴笛（割柑人）
操盤手劄記│中槪股退市鳴笛（割柑人）
包括中石化在內的5家央企，宣佈將其ADR股份由紐交所退市。
中美金融戰升溫！上周五港股收市後，中國5家央企——中國人壽（2628）、中國石油（857）、中國石化（386）、上海石化（338）、中國鋁業（2600
），喺不足半小時內，先後公告計劃將其美國存託股份（ADR）由紐約證券交易所退市，預計9月初生效。中美就中槪股審計監管嘅爭議，在於中方唔想交出審計底稿，而美方則要睇審計底稿全相，否則依法退市。如今央企主動告退，所傳遞嘅訊息似乎係中方對審計談判失去耐性，相信退市消息陸續有來。
美股、外匯、加密貨幣免費即時報價，自選投資組合獲取相關新聞提示。
今年3月起，美國證監會分批將中槪股列入「預計除牌名單」，截至上月，已有159家中槪股榜上有名，佔整體六成；上述5家央企，都係5月26日上榜。中美審計談判遲遲未傾掂數，中槪股大致已有退市準備，尤其擁有數以億計用戶大數據嘅平台，例如阿里巴巴（9988）、京東（9618）、百度（9888）等。以阿里為例，上月就申請轉為港美雙重主要上市，一來為美國除牌留定退路，二來為晉身港股通「北水掃貨名單」鋪路。
港美交易差別 印花稅成關鍵
過去一年幾，大型中概股嘅股東不斷由美國搬貨嚟香港，在港註冊兼存放嘅股份佔已發行股本嘅比例，多已超過五成，現時阿里港股佔比近六成，京東、百度港股佔比更超過八成。不過，股東搬倉來港，未見帶旺港股市場交投。再以阿里為例，集團喺轉主場份通告指出，截至6月底止6個月，其港股日均成交約7億美元，其美股日均成交約32億美元；換言之，阿里港股成交只佔整體成交不足18%。
點解？大概反映港美市場交易成本嘅差別，港股交易最大使費係股票印花稅，上年8月起，更由買賣雙邊各付0.1%上調至0.13%；反觀美股交易，則無收股票印花稅。因此，即使阿里、京東、百度等大型中概股過半股份已來港註冊，但其港股成交只及其美股成交約兩成。至於股東搬倉來港係咪一定部署沽貨，則難一槪而論，除非股東有套現計劃，或港股有明顯溢價，否則要畀轉換股份費同股票印花稅，誘因唔大。
美資機構股東 未必跟隨轉場
要注意係，若中美雙方都唔肯喺審計談判中讓步，中概股大規模退市風險極高，盡管大部份已做好準備——據財庫局講，已有七成中概股來港作第一或第二上市；但問題係，美資機構股東係咪願意跟隨轉場來港買賣，抑或寧願沽貨轉買其他股票，話曬港股交易涉及印花稅額外成本。中槪股退市，一方面可能失去美資股東，另方面可能吸納中資「北水」股東，但喺股東基礎同交易數量轉變下，估值短線難免下調。
上周五喺美股市場，反映中概股表現嘅納斯達克金龍中國指數反覆微升0.2%收場；但率先公告主動由美股退市嘅國壽、中石油、中石化、上石化、中鋁，美國股價跌幅較大，分別較香港股價低1.4%、1.6%、2.7%、1.6%、1.7%。《華爾街日報》引述消息稱，國家主席習近平計劃喺中共二十大後，11月外訪東南亞，出席G20峰會同APEC峰會，期間將晤美國總統拜登。中槪股食粥食飯，「習拜會」料有分曉。
割柑人
曾任財經記者、編輯，在本港報章撰寫財經專欄逾十年
www.fb.com/hkstockpicker
本欄逢周一刊出
操盤手札記 - 割柑人 舊文
本文作轉載及備份之用 來源 source: http://hk.finance.yahoo.com
