渾水專欄 - 渾水 2022年8月18日

渾水專欄 - 渾水 2022年8月18日


渾水專欄│股東維權行為藝術化（渾水）
渾水專欄│股東維權行為藝術化（渾水）


滙控應否分拆，其實已經去到政治層面嘅討論。

如果大家係中環行開，都會見到一個流動車，喺HSBC中環總行附近出現，都係一班小股東爭取將滙豐亞洲獨立分拆出嚟。

美股、外匯、加密貨幣免費即時報價，自選投資組合獲取相關新聞提示。

宜家最新事態發展係，連滙控（005）最大股東平保（2318）都跳出黎，批評滙控管理層自月初業績發布會以來，明顯不停誇大分拆不利的影響，卻完全無提過分拆帶來嘅潛在巨大優勢與長期價值。

按照平保同埋一班爭取分拆嘅小股東觀點，佢哋主要覺得滙豐亞洲業務嘅估值被整個控股集團所限，以致巨大潛力資本遲遲未有釋放出黎。

簡單來講，就係覺得亞洲市場搵到食，無理由整間公司嘅估值，監生被其他市場如歐美地區等表現較遜色嘅環球業務所拖累嘛。

我自己是咁睇的。滙控應否分拆，其實已經去到政治層面嘅討論。例如我最愛的葉劉，接受彭博訪問嘅時候，都好希望滙控總部去返香港。值得留意嘅，佢唔係叫HSBC，佢係用返以前香港人嘅稱呼Hong Kong Bank。

我從來都唔係滙控股東，客觀講，分拆滙豐亞洲出嚟係可以降低地域性政治制裁風險，同時亦都方便基金重點做分析決定。可能有機構投資者淨係鍾意亞洲業務，唔鍾意歐洲。分清楚，基金投資嘅目標就會更加清晰，唔使捆綁一齊拉上肥下。

小股東出埋流動車宣傳
我自己都有好幾次參與股東維權的經驗。以前嘅股東維權，最出名當然係David Webb，佢會通過喺網站寫長文，甚至是發公開信，發動媒體攻勢，令公眾了解更多有關案件嘅內幕、揭密個別公司枱底交易秘聞。又例如，幾年前有個亞皆老街基金，購入中巴（026）部分股權後，乘勢出公開信，利用公眾輿論狙擊中巴，迫中巴管理層增加派息⋯⋯

唔好以為中環人外表斯斯文文，實際上可以黑暗到你唔信。上述只係一啲文攻溫和狙擊嘅例子。有時候，為咗自身利益，交戰雙方可能會喺股東大會上出動打手（真係打嗰啲打手）、黑社會，互相恫嚇。去年也發生過一單，各位大多可能都知道，不開名了。呢類互鬥當然不太文明，但還是偶有出現。

我本身對呢類屢屢發生嘅文攻武鬥，已經見慣不怪。

但估唔到，到咗今日，類似嘅金融紛爭，竟然會演化到「行為藝術」嘅水平層次：大大架流動車係股東會同埋銀行分行面前走來走去，代表一班小股東苦主發聲。哈哈，呢個反而不失為江湖上嘅一種雅趣。

渾水
本欄隔周刊出
渾水專欄 - 渾水 舊文

本文作轉載及備份之用 來源 source: http://hk.finance.yahoo.com