【平民投資教室】錢俊：ETF的姊妹ETN
平民投資教室
日期：2023-04-11
更新時間：10:13:19
錢俊主力介紹港美上市嘅交易所買賣基金ETF，醒目嘅讀者或者都有機會自己發掘，偶爾會喺美國市場睇到ETF姊妹產品嘅ETN。大家都係做差唔多嘅功能，到底好處壞處喺邊度？
ETN
全名為交易所買賣票據（exchange-traded note）。顧名思義，與ETF一樣都係可以喺一般交易所進行買賣，只要有股票戶口基本上都可以輕鬆買賣。而且兩者大部份都係以追蹤指數為主，即係被動地按指數升跌俾返同樣嘅回報投資者。管理費都係比一般基金平。
唔同嘅就係，ETF係基金嘅一種，即係買咗之後，佢係會買貨（不論實貨定衍生工具），以近似指數成份比例嘅持倉以追蹤指數。由於基金與指數成份好難百分之百一樣，因此會造成追蹤誤差。
反過嚟，ETN更加似係債券，係一紙承諾書，多數由銀行或金融機構發行，喺扣除費用後，承諾提供與指數相同嘅回報俾投資者。因此理論上當中唔會有追蹤誤差。而且由於唔係用實貨造成，ETN可追蹤更難買貨生成嘅指數，俾投資者更多選擇。
BNKD：唯一同銀行股對賭嘅交易所買賣產品
以MicroSectors U.S. Big Banks Index -3X Inverse Leveraged ETNs（BNKD）為例，係美國市場唯一能純粹對銀行股做反向投資嘅交易所上市產品。成份為十隻美國最大型嘅銀行，包括摩根士丹利、高盛、花旗、美銀等。管理費亦只係唔過1%。由於上月爆發嘅危機令銀行股急瀉，基金年初至今回報為42%，比之前錢俊介紹反向所有金融股嘅Direxion Daily Financial Bear 3X Shares ETF（US:FAZ）嘅17%升幅為高。
投資風險以外，買ETN最大風險就係交易對手風險（counterparty risk）。由於ETN只係一紙婚書，若果發行商倒閉，或者兌現唔到承諾「違約」，投資者就可能血本無歸。比如2008年金融海嘯之時，雷曼兄弟銀行有三隻ETN，公司倒閉時就等於零。反之，ETF有貨喺手，理論上就算發行商執笠，資產仍然係屬於投資者，持倉亦比較透明。
另外就係流動性風險。ETF市場遠比ETN交易量大得多。好多ETN交投唔多，買賣差價大之餘，因賺唔到錢而下架機會都比好多ETF大，有機會喺市差時被迫賣出。
事實上港美上市嘅ETF種類繁多，作為長線投資嘅選擇已經足夠。錢俊會建議投資初哥或懶人無必要都唔洗睇ETN，免卻一啲唔應該冒嘅風險。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
