港股今年由好威變到冇乜特別，都可以話係香港經濟嘅寫照。
港股又再次跌穿20,000點，今年年頭升幅領先全球，到最新只係平平無奇，由好威變到冇乜特別，港股都可以話係香港經濟嘅寫照。相對同期納指已經上升12%。正如去年開始反彈時，本欄寫過，雖然反彈初期港股可能會升得較快，但係論升勢持久力，
一定係美股更佳，所以建議大家買美股博反彈，又比本欄言中。
美股外幣即時報價 多國新聞任睇
畢竟曾經都喺港股買賣，高明無謂再對港股落井下石，只能夠話港股就係咁，每次出現升勢，最後總會令人失望收場，究竟係香港股市參與者太聰明，每次出現升勢都必然用財技把握機會，一滴都唔留畀投資者；定係港股歷來都係國際金融散貨場，所有資產都係用嚟沽出？咩原因已經唔重要，總之仍然留喺港股市場，心理都非常強大。
可能會有人話，買賣股票唔應該淨係睇指數，喺好多其他市場可能係，但係喺港股，如果連指數都入唔到嘅公司，差唔多可以肯定，同現時全球正在冒起嘅概念都幾脫節，甚至可以話，撇除港股頭十幾廿隻，其他股份跟唔上同世界發展。
亦可能會有人話，炒波幅都走咗幾多轉，指數升跌幾多關咩事？喺呢度就要分清究竟係投資定係投機？幾乎所有嘢都有投機價值，例如口罩，一樣可以炒幾轉。大膽假設恒指有一日變返四位數字，可能亦都充滿投機價值，只要有波幅，就有投機價值。
開心港股 用人民幣計價
投資價值就係另一回事，第一，世界已經重回有利率嘅年代，買資產必須有一條數，就係跑贏存款利息，否則去做定存好過；第二，有冇經過內含價值嘅分析去評估投資價值；第三，現代投資最重要，就係資產價格跌咗起得翻身，即係投資者不幸高追咗，資產嘅質素令到價格情緒上回落後，又返到家鄉，甚至升突。
起碼符合以上三點，先至叫做有投資價值。如果向前看，當然無法得知邊個市場有足夠嘅反彈力。但係投資都有一定規律，過去美股可以接連破頂，相對港股浮浮沉沉，世界資金對於兩邊嘅睇法，其實都好明確。
值得一題，今年MOEX俄羅斯指數（IMOEX）盧布計價年初至今上升21.9%，全球升幅最勁，而俄羅斯盧布相對美元年初至今升值10.78%，股幣雙贏。今年香港連俄羅斯都不如。
如果要搞「開心港股」活動，港股唯一出路，就係改為人民幣計價，由過去靠攏嘅一邊，全面改為靠攏另一邊，唔好成日執美帝二攤：見納指成功，就搞港版納指；美帝出AI，個個又搶住搞語言生成。目光放更遠大嘅俄羅斯路線，已經證實係一條明路，嚇嚇食美帝水尾，亦都難怪港股次次升幅變波幅。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
