蘋果總裁Tim Cook表示「印度很多人進入中產階級，印度正處於一個轉捩點。」
據報來自中國嘅自由行在香港消費力薄弱，高明剛剛歐洲遊，路經巴黎，照計最多名牌嘅地方，應該最多中國遊客，可惜凡爾塞宮、LV等，普通話人口真係唔算多，取而代之，一團又一團嘅南韓遊客更多，有朋友去其他地方遊行，都
有類似情況。高明個人情況，就係多咗人問are you Korean？亦都曲線證明咗邊度嚟嘅旅客最旺。
美股外幣即時報價 多國新聞任睇
反映中國消費力嘅蘋果產品亦都有疲態。最新蘋果（AAPL）業績，大中華區業務今年第一季銷售額為178.1億美元，按年下跌2.89%。任何經濟體系都會由發展中變成成熟市場，中國亦唔例外，喺多方面都出現特徵，包括：中國已經脫貧；數量上，經濟增長由高速慢慢減低；從質去睇，過去中國遊客買名牌嘅炫耀性消費，現時已經唔介意周街食飯，從浮誇回歸簡樸。
喺個人層面當然係好事，始終成身名牌，最後個樣先緊要。但係由股價出發，中國增長減慢，旅遊業只係其中一個體現，消費品、奢侈品需求冇以前咁強，又或增長放緩，對股價都係災難，因為失去一個14億高增長市場。
印度人口取代中國稱冠
好彩嘅係，江山代有人才出。據聯合國經濟和社會事務部推算，印度人口在4月底達到14.25億人，5月起，印度取代中國，成為世界人口第一大國。蘋果總裁Tim Cook表示「印度很多人進入中產階級，印度正處於一個轉捩點。」除咗買蘋果產品之外，蘋果舊年開始喺印度組裝iPhone 14，印度商業和工業部長 Piyush Goyal 1月表示，蘋果目標係印度生產 iPhone由目前6、7%增至25%。蘋果一間大廠過去，成個供應鏈都要跟，久而久之就慢慢培養出更多產業，好似中國增長故事嘅翻版。
人口排第二嘅中國，同時亦都係GDP排第二；印度人口世界第一，但GDP只係排第六，印度可以向上嘅空間更大。當然，中國崛起源自低成本勞動力和大規模生產，被視為世界工廠。印度經濟則以服務業為主，特別係IT和商業流程外判行業，要完全複製中國工廠似乎好難。
但人口多就自然有潛力，科技大廠都要插旗，把握增長機遇。根據世界銀行和國際貨幣基金組織的數據，中國中產階級人數約為4億人，佔總人口近30%。印度中產階級人數約為2.6億人，佔總人口約20%。當人口由貧窮提升至中產，就開始要買炫耀性消費，即係全球嘅消費增長動力有下一手接力，唔需要太擔心中國消費者步入簡樸影響企業盈利，有朝一日蘋果業績會分拆印度銷售額獨立成一項，現時未咁做，即係潛力仍然未發揮。
印度當然自己都會有印度騰訊、印度阿里巴巴。但睇過咁多年嘅中國增長後，由平平無奇到大國崛起，土炮嘅升幅一定最勁，但大國崛起後，食曬成個升浪，永遠都係外資，包括蘋果及LV（MC．Euronext巴黎），始終炫耀性消費，都係買外來物。印度只係追返嗰一成中產比例，已經有多1.4億中產消費力，就算做唔成世界工廠，淨係消費力崛起嘅一半，已經係另一個增長故事。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com
