【平民投資教室】錢俊：虛擬貨幣以外的金融科技潛力
平民投資教室
日期：2023-05-16
更新時間：10:27:28
近期較多人講ChatGBT等AI技術，事實上科技發展仲有涵蓋其他領域，包括金融科技。最多熱炒嘅當然係虛擬貨幣同區塊鏈技術，除此之外仲有好多方面具潛力嘅地方。
較廣為
人認識又發展成熟嘅有數碼支付。比如中環打工嘅錢俊，手機無裝PayMe嘅話，基本上好難同同事或附近工作嘅朋友食飯。香港以外，近在中國國地，若果你無裝支付寶同微訊支付，應該連買杯珍奶都有阻礙。有研究顯示，全球數碼支付金額從2016年6,350億美元攀升十倍至2021年的6.7萬億美元。當中如何優化支付過程、搶佔生意份額、以及推出更多實用或消費功能，就決定業內公司嘅優勝劣敗。
另外較新嘅範疇包括點對點借貸（P2P），即係借款人喺無傳統銀行或中介嘅情況下通過網上獲得貸款，有啲似有借有還版本嘅眾籌。根據估計，2019年全球P2P借貸市場規模為約680億美元，預計到2027年將達到近5,600億美元。當然，現時好多地方包括香港喺法規上未能容納相關業務，但繼續發展下去或有機會似虛擬貨幣一樣嘅新興領域。
資產或財富管理上，智能投資顧問亦開始受投資者知曉，以大數據幫助分析投資同入市機會，及整合個人投資組合。近年有討論所謂資產代幣化（Tokenization），將虛擬甚至係實際嘅資產物件、房地產、投資基金等，分拆「股權」喺虛擬交易所交易，令投資者更容易交易。
3185：環球金融科技發展
好多較出名嘅上市科技公司都有相關金融科技業務，但可能只係佔業務收入好少部份。如果想淨係投資金融科技領域，或者需要發掘業務較專注嘅公司。喺香港上市嘅ETF入面，有Global X 金融科技ETF（HKG:3185）。基金旨在投資新興金融科技領域嘅公司，其中包括一系列透過創新科技去改變保險、投資、籌款和第三方貸款等行業嘅流動同數碼解決方案。
基金投資環球股票市場，十大持倉包括數碼支付巨頭PayPal、推出金融及退稅相關軟件嘅公司直覺電腦（Intuit）、金融數據服務公司Fiserv等。
表現方面，年初至今升8%，雖然跑嬴恆指，但比美股科技公司主導嘅納指18%回報低得多。由於行業較窄，分散風險能力比納指等綜合科技指數弱。同時，基金管理費達0.68%，比一般被動指數ETF高。總括而言，呢隻ETF或者適合睇好金融科技而想專注投資呢個板塊嘅投資者，投資組合亦宜涉獵多啲對其他行業，以分散單一行業風險。
想聽其他投資Topic？話我知：chinjun.column@gmail.com
FB: chinjun.etf
IG: chinjun.column
以上觀點僅為個人分析，並不構成任何投資建議。
平民投資教室 - 錢俊 舊文
本文作轉載及備份之用 來源 source: http://hksmedia.com
