古星輝 - 5G結合AI及物聯網 打造機械人經濟 | 乜都5G
從前機械人只係電影橋段，隨5G發展成熟，機械人應用方案應運而生，機械人經濟漸漸成型。根據國際機械人聯合會嘅報告，預期今年全球機械人市場嘅規模將會達到660億美元。該會主席更認為，AI、物聯網及5G技術嘅深度融合，將會賦予
機械人更強勁嘅智能化、靈活性與效率。
縱觀現時，亞洲仍然係最大嘅機械人市場，當中中國與日本分別位列首次席，美國緊隨其後。記得年初講過，中國十分看重機械人產業，目標喺2025年成為全球機械人技術創新策源地。截至今年7月，中國持有機械人相關嘅有效專利超過19萬項，佔全球三分之二。上星期喺北京舉行嘅「2024世界機器人大會」，為方案生產商提供一個展示成果嘅平台。本屆大會以「共育新質生產力，共享智能新未來」為主題，集合169間機械人產業鏈相關企業，熱鬧程度為大會十年之最。
人型機械人能文能武
大會共展出超過600件創新產品，當中60款係首發新品，27款屬於人型機械人，適用於家庭及工廠等不同領域，成為是次大會焦點所在。當中唔少款式更可應用於家庭或醫療領域，無論摺衫、寫大字、日常分類均做得頭頭是道。
其中，AI機械人助理S1喺展區上演揚琴、武術、書法三台大戲，既能文亦能武，吸引大量觀眾和媒體駐足，技驚四座。據資料所得，開發商對S1硬件仿照人類如速度及負載等身體指標，配合AI採集不同範疇嘅真實動件數據，令機械人快速學習及進化。有業內人士更建立機械人軟硬件庫，協助廠商節省調研時間，加快生產，將生產程序提速10倍以上，不久將來見到更多應用於唔同場景嘅機械人湧現。
同一時間，馬斯克嘅Optimus機械人正在尖沙咀展出，各位不妨趁最後3日展期去近距離朝聖一下。
和記電訊香港執行董事及行政總裁
古星輝
乜都5G - 古星輝 舊文
本文作轉載及備份之用 來源 source: http://www.stheadline.com
