大師冇點你│高人工又點？冧掂老細就係王道（李聲揚）
大師冇點你│高人工又點？冧掂老細就係王道（李聲揚）
領展（0823.HK）王國龍嘅人工，近期成為網上話題
。其實又唔係你嘅錢，關你乜事？真正要學嘅，係學人哋點冧掂老細。
美股外幣即時報價 多國新聞任睇
王國龍已經減咗10%人工
小弟一向唔多想寫呢個課題。一方面，小弟唔係好同意仇富嘅心態，私人公司人工，關你乜事？你覺得唔值，股東覺得值咪得。有次食飯有人問王生會唔會考慮減人工，你想人點答？而另一方面，呢個係開真名嘅專欄，亦都唔係好想得罪人——出嚟行，都係多個朋友好，特別係富貴嘅朋友。
當然，佢份人工已經俾人講咗好多年，最近又拎出嚟講，皆因領展裁員。咁但，其實私人公司炒人，經常出現。大家打公仔當然唔開心，但為何有啲公司就拎嚟同管理層人工一齊講？之前某大本地銀行炒人，一樣係熱話，但冇乜人研究個CEO年薪。
況且，新鮮滾熱辣嘅數字，王國龍已經減咗人工。由7700萬，「勁減」至7000萬，10%喎，好多架啦！
我比較右傾，相信資本主義，有幾多能力咪拎幾多人工。得罪講句，又唔係你嘅錢，股東話OK咪得。但我反而想知，點解股東一路都冇出聲？真心想知。
因為根據資料，王生份糧，在香港上市公司中，都真係數一數二。唔上市嘅公司冇數字，冇人知。但計有公開資料嘅香港上市公司，冇幾多個高得過王生。
數得出嘅，友邦（1299.HK）嘅李源祥，仲有長和（0001.HK）嘅傳奇陸法蘭（細細個就聽過，都有幾面之緣）。之後？連港交所（0388.HK）或者長實恒地新地，都冇人咁高人工。國泰（0293.HK）嘅林紹波，拎1000萬人工多啲。
資本主義嘛，都係上市公司，我哋當然講錢。問題係，講市值，講盈利，領展肯定都唔係市場上數一數二。講股價表現，亦都唔係數一數二。但何解王生份糧，就係數一數二？
做房託拎到7000萬人工 應該都世上少見
另一個角度，好多人心中想講，但唔敢講，就我做醜人。OK，人人都好專業。但其實坐住一堆商場收租，使唔使7000萬人工？使唔使好高技術含量？相比之下，好似run一間交易所，run一間airline，難度高好多？做房託拎到7000萬人工，應該都世上少見。
你話係做靚刁，又唔係好覺近年有乜好嘢。至於講話融資之類，領展搞到供股添，好難話睇市睇得好準吧？
當然，講到尾，股東撐咪得。小股東就多數冇乜say，領展股權分散，有理由相信最大啲股東都係啲大基金。冧得掂佢地，咪掂。所以大家真係要向王生學下嘢，我諗呢個先係重點。畢竟公司唔係佢嘅，佢冧得掂其他人畀佢咁人工，自有佢過人之處。可惜我怕醜，上次食飯都唔敢當面問佢叫佢過幾招畀我。
最後可以申報下，本人持有唔少領展股票，亦係我輸錢最多嘅股票（金額計），計埋派息都應該係。但亦要講，4月關稅「解放日」時我就買咗唔少領展，之前沽咗，呢度亦都執返啲（唔好問我點解關稅日要買領展，我一樣有買其他嘢，使唔使全部講一次？）。絕對唔係輸錢鬧人，投資當然自負盈虧，不過實話實說，申報得就講埋。
呀仲有，以往領展業績後，不時搞啲發佈會，都有請過小弟去食飯。不過上次就冇，唔知係慳皮唔搞，定冇請我，定接頭人已經畀人炒埋。點睇我都冇做過或講過啲唔識趣嘅嘢，有人去問王生會唔會減人工，但唔係我。至於我話輸錢，居然有管理層睇到，令我受寵若驚，但依然仲有叫我去的。
無論如何，如果下次再搞，記得叫埋我——上次支紅酒好正，可惜我冇影（雖然應該都係酒店嘅例牌嘢）。
李聲揚
前大行分析員，如今無業遊民，別人恐懼時我貪婪
FB Page︰meatbonetea金融肉骨茶
本欄逢周一刊出
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
