大師冇點你│走寶倍升股的教訓（李聲揚）
大師冇點你│走寶倍升股的教訓（李聲揚）
今日同大家講一隻走咗寶嘅股票，就係美聯（1200）。升咗好多啦，而家就唔抵買。咁點解仲
講？由過去走寶嘅經歷，都可以學到嘢，長遠令自己功力更高。今次走寶，下次就唔好啦。而只要你有錢，股市就永遠都有得玩。
美股外幣即時報價 多國新聞任睇
照計唔使我多講，大家都知美聯係做乜的。所以亦都唔使我多講，大家都估到之前嘅股價梗係唔掂。樓市跌，成交少，經紀生意自然大受影響。
不過，股市永遠炒預期。正係因為樓市差，股價先抵買。畀你捉到個轉角位，就不得了。今年暫時樓價都係反覆，都好難講係咪見底——但美聯股價又係另一回事。
換個角度講，再唔掂嘅公司，都總有個價。之前預佢會執笠，但如果死唔去嘅，畀你搏中，已經係好大嘅升幅。
廢話少講，睇實數。今年早前，好大段時間，美聯股價都係在1蚊左右。我記得2月尾，財政預算案嗰時，我短炒過一次，搏會有啲政策利好樓市。結果係冇嘅，股價亦都冇彈，甚至開始跌。
但我冇走到，然後過咗一兩星期，股價反而開始升，大約低位升咗20%，由我買入價開始計升10%，我就走啦。仲沾沾自喜添，一個月唔夠執10%，勁過畢菲特。
之後，美聯股價開始回落，但近排再開車。而家？講緊2蚊。你冇睇錯，半年唔夠，1蚊變2蚊。又話樓市已死？
近期升乜，我都唔係好知，事實好多香港嘅小型股，生意正正常常，唔使執笠嗰啲，近排股價都大升。例如理文化工（746）、亞洲金融（662）、AEON信貸（900）等等。當然，亦可能因為係預先炒「購房通」會出台。
但講返，最初我買美聯，都唔止係因為估樓市回穩，或者有政策出台。有固然好，但冇的話，都要隻嘢有得守。點有得守？就係講你都唔信，美聯嘅業務，其實相當好。
公司12月尾年結，8月尾會出中期業績。但就睇下舊年（2024年）嘅數字，真係相當靚仔，講你都唔信，說好了的樓市已死。
睇收入，舊年去到61億，2023年係41億，升咗一大截。咁當然，同時間開支都升一大截。有乜開支？就係回贈，同埋員工成本。咁當然呢啲開支都升一大截——但呢啲絶對係開心開支，因為呢啲開支係生意好先會升。
扣曬開支後，睇經營溢利，舊年3.9億，之前一年係輸1900萬。如果落到純利，舊年3.2億，之前一年係輸4200萬。
話樓市寒冬，悲慘世界，但美聯賺緊3.2億，你唔覺得搞笑？有幾多公司舊年有3.2億純利？係咪違反你常識？但好多人嘅常識就係錯的。
當然你可以拗，話同全盛時期冇得比，有排都未返到史上最賺錢——問題係，股價都跌咗一大截嘛，你買得夠平就得。股價唔使返返去歷史高位，返到歷史高位一半，甚至細半，已經夠曬。
當然更重要嘅一樣嘢，美聯差不多拎住7億淨現金。咁啱公司股數又大約係7億。亦即係話，差不多每股淨現金係1蚊。換個講法，股價1蚊嗰時，市值大約7億，而淨現金都已經7億。留意係淨現金，公司冇任何銀行貸款。
無論如何，而家股價升咗成倍，暫時呢個位就唔多抵搏。不過呢個故事，好值得大家參考。
李聲揚
前大行分析員，如今無業遊民，別人恐懼時我貪婪
FB Page︰meatbonetea金融肉骨茶
本欄逢周一刊出
大師冇點你 - 李聲揚 舊文
本文作轉載及備份之用 來源 source: http://hk.finance.yahoo.com
