投資的天空：揸重貨宜先減持 - 張士佳
聯儲局議息會議結束，只係宣佈將原於本月底期滿的扭曲操作(OT)延長至年底，市場對QE3的期望再次落空，但實際上唔係太令人意外，睇返過去兩次聯儲局推QE，都係選擇市況極惡劣之時。美國現時雖仍處於復蘇路上，最近的經濟數據亦顯示勢頭有點回落，但講到股市表現，有邊個會話佢唔掂？以前晚的收市價計，距離今年高位不足4%，即使無QE令市場失望，美股當晚仍然非常硬淨，可能與部份市場人士所講的無形之手有關。既然無形之手已有足夠能力撐着個市，聯儲局暫時亦毋須用到QE這道板斧，同時延長OT已可顯示自己唔係袖手旁觀。
相比美股，港股表現則相形見絀，昨日幾乎由頭跌到尾，即使唔理有假數疑雲的內房股，部份板塊亦有輕微洗倉的味道。後市去向，有人話已見頂，有人則話應可再彈多點才見頂，不過共通之處其實都係睇見頂，只係早與遲的分別，如有同樣想法，問題便應轉移至幾時走貨，若然重貨，現階段就應減持，若貨量不多，則不妨等多陣才沽，始終持倉水平的多寡對操作思維有重大影響。
至於組合上，如世房(813)跌穿10.66元，會先行沽出一半。中鐵建(1186)如見6.64元，將會全數沽出，兩者皆為長期指令。
筆者客戶持有世房
張士佳
與曾卓鋒(寶來證券業務經理)聯合執筆
(逢周三、五刊出)
上一則: 青心直說：沽空榜暗藏冷箭 - 胡孟青
下一則: 外幣兌港元
投資的天空 - 張士佳 舊文
