金融High Tea——恒大驚魂
2012年6月22日
期待以久的美國聯儲局會議結束，暫無QE3(第三輪量化寬鬆)，但係就延長沽短債買長債的「扭曲操作」，並且加碼2670億美元，值得注意的是聯儲局強烈暗示有需要可以出QE3，市場估計佢8月開會時會出招，不過由於現時暫無招出，金股油各種風險資產都回吐，港股亦跌253點。
中環茶友話，聯儲局開會結果唔係咁差，8月QE3的預期大增，但由於暫時無QE3，個市上衝咗一輪都要唞唞，會繼續回吐整固，但又唔使睇得太淡。美國11月總統大選，而家聯儲局先加大扭曲操作規模，若到8月再加QE3，兩者相加放水規模都唔細，又會谷起個市炒番三幾個月，實行再保送奧巴馬入白宮，呢個故事大綱，都幾配合五窮六絕七翻身的炒法。
聯儲局開完後，在油金股匯中，石油最弱，跌到80美元邊，因為聯儲局不但無出QE無推低美元，仲調低美國經濟增長預測，從而影響到石油需求預估，所以油價大受打擊，小心各類能源股包括煤股、氣股都會再插。
匯豐裝咗避雷針
昨日講到匯控(005)超強，昨日強勢持續，大市跌1.3%，佢跌0.3%，買咗大笨象好似在身上裝咗避雷針一樣，幾正喎。
阿爺降存款準備金率又減息，放水救市，內地樓市出現「小陽春」，北京就有21個樓盤加價賣樓，內房股趁機反攻，威咗幾日，阿爺唔想努力近兩年的調控樓市措施功敗垂成，踏入6月，人行、住建部多個部委不斷出口術，希望樓價唔會又癲過。內房股應聲下跌，多隻內房股跌到七個一皮。中海外(688)比較硬淨都要跌近4%，碧桂園(2007)、富力(2777)、世茂(813)都跌超過半成。
家印哥唔見半百億
不過，昨日都係隻恒大地產(3333)跌得咁驚心，主要係有民間調查機構Citron出報告指控恒大涉嫌帳目造假，又話佢賄賂內地官員，恒大股價受報告影響，由上日收4.48元，昨日早上一度大插至3.6元，大跌19.6%，連帶恒大發行的債券，都跌咗7、8%，持重貨者有理無理已被人打兩巴。恒大在中午休市期間發通告指報告中的指控失實，恒大主席許家印亦在分析員電話會議中直指報告造謠，話會組織龐大律師團隊回應，要採取法律行動咁話。
恒大澄清後，股價在下午反彈，最高彈番上4.2元，收市回番落到3.97元，計落都跌咗11.4%，成交高達37億，以大股東許家印持股62.5%計，昨日一跌，家印哥身家暴跌47.7億大元。Citron的指控是真是假，尚待考驗，但問題係呢啲機構出咁負面唱衰報告，佢自己有無沽空有關股票？若然無沽空就客觀好多，若有沽空，報告一出唔知真假有關股份已大插獲利。萬一最後查無實據，小股東在驚嚇中沽出股票輸咗錢，咁又點計？
恒大捲入這些風波中，股價上落波動好大，投資者務必要十分小心，膽汁少者唔好掂佢好啲。我識個大戶昨日見恒大暴跌，上午收市前在3.8元撈貨，下午彈番到4元已走人，幾個鐘食咗5%。佢話呢啲順風車搭兩個站就好啦，唔想過夜，過夜可能博得更多，但落咗袋先至係錢，保險無價喎。嗱，呢啲就係專業炒友啦。
陸羽仁
上一頁 下一頁
金融High Tea 舊文
