中環在線：風水佬殺入倫交所 - 李華華
《塔羅算命》除咗有靚女塔羅師算命，仲有紫微鬥數算命，賣寶石賣吉祥物……相當多元化。
提起風水算命，會即時諗到蘇民峰同麥玲玲，但估唔到同新天地都有關係！不過華華講嘅，唔係瑞安房地產(272)旗下諗住要分拆上市嘅中國新天地，而係新加坡一間算命公司。
呢間算命公司原名叫緣中秀，1992年喺新加坡成立，老闆叫彭鐘樺，人稱「麥大師」。睇公司網頁介紹，麥大師係少林寺第31代弟子，法號釋德松，細細個就研習玄學同風水學命理，除咗一般幫客人睇風水轉運之外，仲聲稱幫過多位排喺中國富豪榜頭400位嘅有錢佬策劃投資同企業發展目標，認真巴閉！
《少林出身》老闆彭鐘樺自稱少林寺第31代弟子，仲話自己係東方佛洛伊德，人才濟濟。
《抽水千億》來自星洲嘅新天地集團準備喺倫敦二版上市，集資150萬鎊，即係1800萬港紙。互聯網
「新天地」抽水150萬鎊
而緣中秀會改名「新天地集團」，喺倫敦二板市場AIM上市，集資150萬英鎊。據資料講，公司舊年收入6000萬人民幣，稅前盈利有1400萬人仔，麥大師持股約62.2%。公司旗下有30個專業風水師同100個專業助理，今次上市抽水，主要係想發展中國市場，計劃開50間分店咁話。
緣中秀喺新加坡牛車水有舖面，公司宣傳資料仲話，至今已經喺馬來西亞、香港、澳門同大陸等地開設咗十幾間分店。據新加坡傳媒報道，麥大師當年發現一種叫「火山琉璃」嘅礦石，跟住做起寶石同風水生意。據講佢店舖賣嘅豬型生肖像，要1888人民幣，而鳳凰造型嘅吉祥物，要成3萬人仔，同買個LV冇分別！
李華華
mailto:LiWaWa@AppleDaily.com
上一則: 國策透視：香港化身國策試驗場 - 郭小民
下一則: Head & Shoulders搞資產管理 - 李華華
中環在線 - 李華華 舊文
