金融High Tea——浪底潛行 靜待黎明
2012年6月25日
■滙控受穆迪下調評級影響，股價上周五下跌1.2%，收報67.45元，仍比恒指的1.4％跌幅少。
港股成交每況愈下，恒指上周五收18995點，只跌269點，在美股杜指上日大跌250點的影響下，港股唔算跌得多，但睇成交就認真唔開胃，只有379億，連400億大關都跌穿埋，顯示散戶興趣缺乏，一副「醫番都嘥藥費」的模樣。
美國暫時唔搞QE3(第三輪量化寬鬆)，港股在浪底潛行，短線自然睇淡，你知陸羽仁愛相反理論，認為這種散戶完全無興趣炒股的時日，正是投資者低吸股票之時，買入股票，靜待黎明，到市況好轉之時，大市升番3幾千點時沽出，都唔係太難的事(嚴格而言只是半年「投資」)。當然，最好分段慢慢買，買完一注想個市再跌啲買第2、3注的心情，當然好過一注入晒之後見到個市再跌的慘情。
你見我話買股等個市升3幾千點，而唔係大升特升，可能會覺得我睇市都睇得幾淡，我話過去呢一兩年大市有波幅，無大升幅，和歐洲反覆惡化，美國未全面好轉，中國焗住收水這三大因素有關，當中最關鍵的是歐債危機無根本解決，就如癌症一樣，反覆擴散，又反覆電療、化療控制病情；你買股就要學會與癌症共舞，直至見到癌腫切除為止。
撥千三億 有好過無
上星期五歐羅區最大的四個國家德國、法國、意大利和西班牙四國首腦在羅馬舉行會議，同意拿出1300億歐羅，即整個歐洲生產總值的1％，制定一籃子計劃刺激經濟增長，但會議就未能就發行統一的歐羅債券達成共識。歐洲將在本周四舉行歐盟峰會，歐洲峰會前舉行前四大國首腦首先開會，係想先統一意見，尋求解決西班牙和意大利債務危機，以及穩定歐羅匯價，如今四國達成的刺激經濟共識，好大機會在歐盟峰會上通過。
四國的分歧主要在歐羅債券上，法、意、西三國贊成發行歐羅債券，德國反對。法國總統奧朗德不無諷刺咁話，「歐羅債券是一個有用的救急工具，歐羅區不必等到10年後再利用這一工具。」但德國總理默克爾立場強硬，認為先要實現財政一體化才可以推歐羅債券。
歐洲大國同意推1300億歐羅去救經濟，都係一件好事，因為德國過去力推以緊縮政策解決債務危機，不贊成刺激經濟，今次總算作了少少讓步，雖然1300億歐羅對龐大的歐洲只是九牛一毛，但都係好過無。
明年改選 德國窒手
歐豬國家的債息反覆上升，當債息太高，經濟增長率低時，經濟就不可持續，無乜經濟活力的希臘要長期捱7厘債息當然無可能，經濟動力較強的西班牙亦頂唔順7厘債息。發行歐洲聯合債券，等如以德國為首等經濟強國為照保，債息即刻可以降低3幾厘，令歐豬國不可持續的債息馬上降到可持續的水平，而炒家亦難再狙擊。問題係德國唔同意搞，唔想自己背上弱國條債，堅持要全面實施財政聯盟才做，即係有歐洲聯合財政部長，控制各國的開支，才可以發聯合債券，但據法國高官估計，建立財政聯盟要數年時間，言下之意是遠水難救近火。
所以歐債危機唔係無辦法救，只要強國全面包底就可以啦，但係德國唔願意包底，特別係明年9月德國總理默克爾又要面對總理選舉，佢可以避都會避免在選舉前背上歐洲巨債，以免在選舉時被拉下台。我哋直至見到歐羅債券這類徹底方案落實前，歐洲解救危機的方法都只係貼膠布而已，貼完，救完，好得幾個月又再惡化。所以股市都係咁，救完好咗，炒幾個月，股市又隨歐債危機而惡化，若未見到徹底方案，見股市跌得多低位買入，捱幾個月，上番咁上下就走，等下一個惡浪再來，隊低再買過。
匯控小降 換馬之選
早前講過匯控(005)出奇地堅挺，最近又搵到另一個原因，係外國投資者換馬，沽美國銀行股，換入匯控。
評級機構穆迪在上周五下調包括匯控在內的15家國際大型銀行評級，穆迪全球銀行部門總經理鮑爾話，那些被降級的銀行，都顯著地暴露在資本市場活動波動和極大虧損風險中。
當中瑞信最慘，被連降3級，由「Aa1」降至「A1」。被降兩級的有花旗、大摩、瑞銀、摩通、高盛、巴克萊被降2級，花旗由「A3」降至「Baa2」；大摩由「A2」降至「Baa1」；瑞銀及摩通由「Aa3」降至「A2」級；高盛由「A1」降至「A3」；匯控被下調一級，由「Aa2」降至「Aa3」，評級展望為負面。
論危險程度，以花旗集團、美國銀行為最危，佢地處於最低的Baa2級，僅高於垃圾級2級。穆迪仲話維持呢兩家銀行負向展望，意味可能再度降級。匯控雖被降級，已屬少數較好的類別。穆迪認為，匯控的緩衝資本較為雄厚，盈利能力較其他大銀行強。
匯控受穆迪下調評級影響，上星期五下跌1.2%，收報67.45元，仍比恒指的1.4％跌幅少。其後匯控在倫敦交易時再略為反彈，收市折合港幣67.99元。估計有部份資金在穆迪降級前，已開始移離被降兩三級的銀行股，轉入匯控這類相對降級較少的股份避險，令匯控股價近日走強，所以匯控被降級不應看成為太負面的消息，佢已經好過好多美資銀行。
投行重傷 水清無魚
幾家有好大投資銀行業務的美國銀行被降級，會令環球股市處於更大的低氣壓中。擁有美林的美林和自己營運龐大投行業務的花旗，都只係距離垃圾級兩級，大摩距離垃圾亦只有三級，五大投行中三家漸入水深水熱處境中(其餘稍好的是高盛和摩根大通的投行部門)，佢地評級被降到咁低，首先就影響短期借貸能力，更加無水去炒。其次佢哋營運衍生工具業務，對手都極重視其信貸，因為佢哋一唔掂對手渣都無，如今佢哋被降到咁低級，對手一定要求有較高的擔保才會和它們做衍生交易的對手，亦大大削弱佢哋的交易能力及增加交易成本。
一些資產管理基金就得米，如穆迪畀黑石(BlackRock) A1的信貸評級，唔好講比對美林、大摩，黑石比對高盛都高兩級，有利佢打入債券等資產管理業務，傳統投行運上這些對手更無運行。
投行係股市大鱷，唔止代客炒，好多時自己落場炒。散戶唔鍾意投行在股市呼風喚雨，但投行落難，交易大減，股市亦水清無魚，無厘熱度，開始唔係幾好玩。在金融市場去槓桿化的年代，或許應了債券大王格羅斯的預言，要進入「低回報時代」。
陸羽仁
上一頁 下一頁
金融High Tea 舊文
