期望管理
2012/7/20 上午 09:34:29
網誌分類: 經濟
美國最新公布的經濟數據，無論係首次申領失業救濟人數、6月二手房銷量以及7月費城製造業指數都差過預期。經濟唔靚仔，但大市就偏偏跌唔落去，跌少少就反彈，全日在窄幅波動橫行，杜指報12943點，漲35點。
在一片經濟不景的情況下，美股仍然頂得住，有幾個原因，一方面係歐洲局面比較穩定，德國國會通過資助西班牙銀行業的1000億歐元援助計劃。歐洲經濟弱不禁風，市場普遍以為歐洲企業盈利表現，恐怕都係凶多吉少，誰知昨日發布的業績報告，卻有意外驚喜，多隻歐股股價暴漲，諾基亞勁升12%，帶動歐洲股市造好，平均升至近四個月高位。
美國方面，包括Google、微軟等多家美企亦報出好過預期的季度財政報告，頂住大市，只有大摩出的業績差過市場預期。科技股表現最好，杜瓊斯科持指數漲1.4%，支撐大市向上，當中IBM大升近4%，係表現最好的杜指成份股。
踏入2012年，歐債危機惡化，全球經濟一片暗淡，市場對經濟表現以至企業的盈利表現的預期大幅降低，所以企業只要表現唔係太差，都會好過預期，帶給人「驚喜」。不過頂住大市跌唔落去的另一個原因仍然係對QE預期作怪。
儘管聯儲局主席伯南克沒對是否推出QE有明確表示，但市場相信伯南克會在經濟數據變壞時採取保護措施。淡友唔敢過度對抗市場，怕一旦聯儲局發出積極的聲音，就會損失慘重，就造成經濟愈唔好，向上的支持力就會大的奇怪現狀。當然經濟唔好，投資者亦唔敢入市，個市就唔上唔落。
不過你抽離點去睇，你就會覺得股市唔一定反映經濟基礎，你睇在風眼中心歐洲，綜合反映歐洲股市的Ftseurofirst 100指數，今年至今仍升4.6%，無錯，係有得升，而歐洲經濟強國德國Dax指數升14.6%，美國自然有升，杜指至今升5.9%。香港今升幅和美國接近，恒指去年底收18434點，今年至今升6.1%，中國就慘啦，股市表現差過哂全世界，上證綜指去年收2199點，而家得2184點，今年至今跌0.7%。中國第二季GDP差極都有7.6%增長，而德國預期第二季GDP只有0.3%，兩地經濟增長差別咁大，點解股市反向走呢?
上述股市比較只比今年，如果將個時間段拉遠少少睇仲誇張，美股杜指而家有12943點，距離歷史高位14000點唔係咁遠，歐洲Ftseurofirst 100指數高位5200點，而家係高位六成一。恒指高位32000點，而家得番六成，大陸上證綜指高位6000點，而家得番三分一，點解中港股市咁低，又或者係點解歐美經濟咁差，股市可以咁好?
股市長線跟經濟走，短期跟資金流向，阿爺股市唔得，主要係防高樓價高通脹勒緊褲頭，可以話受歐美放水之害。老外股市得，主要係做好期望管理，我話自己就死，結果被人打跛一隻腳唔死得，就優於預期，只要市場受，大家一齊合唱，就唱出我好好你好差的樂曲。我講咁耐只係想講，國企股跌到好殘，除非你好驚大災難只?現金，否則買大國企安全過你買好多睇起上來好好的資產。
陸羽仁
回應(6) 我想回應
陸羽仁 BLOG 舊文
