金手指：歐美中央放水會幾快？ - 孫柏文
今日，孫柏文想一次過答曬呢幾日來，問候我啲熊證嘅人。我只可以話，未被槍斃、多謝關心。估唔到我啲熊證，紅得咁緊要，變成全城熱話。
講個市，噚日我落筆嗰刻，就好似全球投資者一樣，托腮悶等。聯儲局、歐央行，都喺我買咗熊證後，相繼放料話會「做嘢」，之後噚日又傳我國中央都會加入。咁喺唔知佢哋有乜橋時，就不如估吓。
個市食太多藥勁多副作用
先講中央。大家對大陸數字，相信都係抱住個睇奧運會羽毛球小組賽嘅心態，就係知佢打假、一路勁噓、不過照睇。不過幾假都好，盲嘅都知大陸經濟大幅放緩，中央一定做嘢去救。多唔使講，噚日全亞太區股市都有壓力之際，特區跟住國內都有得升，都係呢個理由。
做香港股民，日日望穿秋水希望祖國學08、09年咁，以斷萬億計嘅貸款推出市場，資金之後湧出香港。其他嘅措施，根本唔夠我哋食，甚至有措施出台時，如果冇啲「萬億貸款」，投資者仲要即刻唔開心咁沽。之後就會有啲分析員行出來安撫話：「中央已經係喺放寬嗰個方向！」你估仲係五年前，聯儲局只係減Discount Rate都出過千點升幅嘅世界咩？
家啲藥已經濫食到出現好多例如嘥錢、亂起冇人用嘅基建、貪汙、呆壞賬、平民憤恨問點解自己唔係幹部等嘅嚴重副作用，不過食唔夠就出現Withdrawal。我國中央唔似歐盟，啲領導對執政地位嘅自殺傾向弱好多，唔會好似愛因斯坦話齋：「癲，就係重複咁做同一樣嘢，不過會預有唔同結果。」所以除咗啲食你唔飽嘅放寬政策外，你係望會有啲幾十萬億救市出台，咁希望你冇睇錯啦。
歐央行嗰邊，大家都估佢可以做啲乜。上個禮拜嘅嗰種做勢，似足07年特區股市。先有個牌面上話得事嘅官出來，今日有行長馬里奧，07年有曾俊華講政府增持港交所(388)。之後就有好多銀河星級嘅友情客串，今日有話行長會會見德國財長傾，07年就有大連官員。結果會係點？今日就德總理嗌停，07年就溫總理嗌停。
西班牙2、5、10年期債息，勁跌後已經開始回升，短債息尤其升得特別勁，即債價下跌，意大利都有同樣情況。不過，股市就一於好少理，大炒上。股市、債市出現分歧，十次有十次，最終都係債市啱。再講，德國要啲出事國家落實嘅政策，係有例子Work嘅。即係就算樓市泡沫爆，政府同時縮開支，再逼銀行收風險，最後都可以唔使將貨幣貶值。邊個地方咁把炮？咪就係香港囉。其實，愛爾蘭都似有咁嘅勢頭，果然係最抄香港政策嘅歐洲國家。今晚就會知歐央行有乜奇招，大家希望壓啱注。
至於聯儲局，我唔講，因為你哋喺我執筆呢刻嘅未來，清楚過我。
投行資產負債表過眼雲煙
最後，前晚我哋獅子山學會為佛利民100歲生日搞咗個Party。有利世民同李兆富孖住咁講解佛利民對歐元嘅睇法，台下有好多外國財俊加入辯論。咁散席嘅時候，撞到一個已自立門戶、管理資產值達九位數字、仲要細過我嘅財俊。佢一開口就講我喺facebook上載咗一幅相。相裡有個被幾個模特兒攬住嘅男人(圖)，不過個男人照樣專心打遊戲機。佢話：「呢啲影一刻Snapshot就最誤導，下一秒條友可能已撲向啲女仔度。」我答：「絕對同意！同啲投行一樣！每季完結時，個資產負債表幾靚呀！點知原來係嗰日啫！」
孫柏文
作者為獨立股評人
本欄逢周二、四刊出
上一則: 創業作業：報紙末日？ - 宋漢生
下一則: 曾淵滄專欄：中央出手實國企 - 曾淵滄
~TITLE_S~金手指 - 孫柏文 2012年8月2日 舊文
