金融High Tea——地價唔升樓價升
2012年8月2日
■嘉華國際現在手頭資金充裕，假如地價再跌，佢哋仲有能力溝淡。圖為主席呂志和。
港股7月全靠最後幾日大翻身。恒指昨日低開150，以為大市會調整一下。誰知低開高走，午後反敗為勝，個市穩定番啲，部份醜股大反彈，但呢啲係高難度動作，唔係一般小戶玩得好。
外圍焦點係美國會否再推新一輪量寬，香港仲要睇多瓣內地。國家主席胡錦濤係政治局發言，強調要穩經濟，呢個調子唔算新鮮，不過，市場都有小小反映，大市係中資股推動下，最高升近100點，但尾市回順，但站穩于牛熊分界線。恒指升24點，報19820點。國企股跑贏恒指，升88點至9763點。大市成交530億元。
風險高地產商要賺盡
梁振英上台倒瀉蘿蟹，暫時無時間搞樓市，住宅價錢又陰陰哋上升，個別區域仲創出二手就高。照睇，梁朝點都會增加土地供應，最低推地都明顯增加，昨日嘉華國際(173)以11.7億元，奪得將軍澳限量地，作價貼近市場預期12億元中標價的上限。
呢塊地規模唔算大，所以除了龍頭地產商，仲吸引好多二線公司入標，截標時地政署上周五接獲7份標書，除嘉華外，長實(001)、會德豐(020)、信置(083)、新世界發展(017)及百利保(617)等有入標。
將軍澳供應多，地產商自然審慎小小，連同呢塊地在內，過去一年幾幅官地成交價，都係三千幾蚊一呎地價，同期區內樓價卻持續上升，顯示房策唔明朗，風險增加下，地產商要賺深啲。測量師估計，地皮中標價介乎10億至12億元，發展商出價較保守。
嘉華近年係投地較多中型地產商，樓盤都有不俗口碑，如果市道保持平穩，相信呢塊地會有錢賺。集團現在手頭資金依然充裕，假如地價再跌，佢哋仲有能力溝淡。做地產商買地等如買原料，無可能等到最平時先出手，如果地價升時唔敢買，政府增加供應時又唔敢買，咁就成日都係得個睇字。
港股昨日仲係同美國聯儲局正在開議息會議有關。雖然分析預期聯儲局冇咁快會推QE3，起碼要等到8月底9月頭，甚至總統大選前至會有實質行動。但淡友唔敢太放肆，怕聯儲局可能會放風試水，隨時會畀夾死。
水泥股又炒國策
另一方面，匯豐編製的中國製造業PMI七月終值為49.3，略低過初值的49.5，就業資料創下40個月來最大跌幅係連續5個月低於50，顯示經濟對就業市場產生壓力加大。經濟數據認真唔靚仔，但內地A股不跌反升，上證綜合指數漲20點至2123點。上證綜合指數跌到2100點邊緣，暫時似乎冇乜空間再跌，市場見到經濟數據無樣好，預期阿爺會進一步放鬆政策，以刺激經濟增長和就業。
內地金融股反彈，亦帶動本地中資金融股全線造好，支撐住大市。恒生中國H股金融行業指數升0.9%。當中以工行(1398)最好，升1.6%至4.52元。
昨日表現標青的板塊係水泥股，原因係中共中央政治局日前召開會議，指「會落實促進民間投資的政策措施，加大對國家重大專案建設的支援」，消息刺激近日跌到七個一皮的水泥股大反彈。華潤水泥(1313)、山水水泥(691)、安徽海螺(914)齊齊反彈，最勁係中國建材(3323)，升5%至8元。
陸羽仁
上一頁 下一頁
金融High Tea 舊文
