中環在線：闊太愛擁舖 - 李華華
投資商舖一直都係有錢人兼小眾玩意，近期城中幾位闊太都玩埋一份，繼賭王四太梁安琪同合和(054)主席胡應湘夫人郭秀萍億億聲攞錢出嚟買舖，有「車位天後」之稱嘅廖創興家族成員廖烈正夫人湯慧靄最近都轉炒舖，三個月擲億五出嚟掃咗兩個灣仔舖。
車位轉寫字樓再轉舖
華華收到風，廖太早兩個幾月前已經出手，用7050萬買咗同時代廣場隔一條馬路嘅灣仔堅拿道西15號一個1200呎茶餐廳舖，佢新近再攞7900萬買咗同街24至25A號地下A及B舖，地下連閣樓1800呎，呎價4.4萬，家租畀廚具店，每個月收緊16萬租，圍番條數，回報都有2.4厘。
廖太千禧年開始狂買車位，億億聲掃貨，所以有「車位天後」美譽，近年佢改炒寫字樓，家仲玩埋舖！聽聞家寫字樓租金開始向下，炒賣空間或者賺錢水位收窄，反而商舖仲有得炒，即使舖租回報奀，但升值潛力大，所以吸引到好多有錢人玩埋一份。
投資開全幢物業嘅四太最近就突然買舖，重手擲4.78億掃入中環擺花街壹號廣場地下3至5號舖連1至3樓樓上舖，而胡應湘夫人郭秀萍早幾日亦用1.18億買入上環荷李活道舖，好似濕平咁掃法，幾咁潮！
李華華
mailto:LiWaWa@AppleDaily.com
上一則: 南韓通脹回落出口急插
下一則: 中環在線：盈警醜婦唔敢見股東 - 李華華
中環在線 - 李華華 舊文
