金融High Tea——業績大過天
2012年8月21日
睇住港股近380億成交，真係有少少唔開胃，個市更易被人舞上舞落，早上10點幾已低見19911點，跌咗205點，後來上證綜指在創2009年3月至今的三年新低後反彈，港股也跟着從「911」這個邪位反彈，一個V字咁升番近200點，全日收跌11點，收報20104點，玩咗一日原地踏步。
內地8月上半月銀行新增貸款狀況不錯，上半月新增貸款約700億人民幣，相比上月同期增加200億左右。
上月新增貸款整個月只有5401億，遠低過市場預期，照8月上半月的貸款走勢，本月新增貸款應有6000億以上。另外，重農行(3618)公佈中期純利增25％至28億元人民幣，無乜重大壞帳消息，股價逆巿升2.3％，收報3.12元。不過其他內銀股在業績公佈前都橫行兼腳軟，跌得較多是農行(1288)，昨日跌1％。
中移動衰在3G客
股市淡靜，資金騰雞，業績有乜風吹草動就出事，同是內地電訊股，中移動(941)和聯通(762)近日走勢係最典型的榮辱互見，中移動昨日跌1.6％，收報82.35元，相反地聯通卻升2.7％收12.18元，關鍵是剛公佈的3G上客數字，中移動公佈7月份3G新增上客量大幅放緩至190.1萬戶，較6月份大跌32.5％，為19個月以來低位。整體3G用戶有6898萬戶。
聯通公佈7月3G用戶淨增長308.7萬戶，比6月再升2.2％，令3G用戶突破6000萬，和中移動的3G用戶數目愈追愈近。由於3G客係高端客戶，是網絡商兵家必爭之地，聯通大力增加手機補貼搶客，連續兩個月新增客戶都超過300萬，而中移動月度新增3G客跌到200萬樓下，的確係一個警號。早前中移動在公佈業績時話今年要額外投放多60億做手機補貼，問題是掟水掟得咁慢，可否扭轉敗局？德銀睇住中移動3G上客放慢，立刻調低目標價，由90元降至84.27元。
唔好以為中移動昨日跌1.6％唔係跌好多，佢自公佈中期業績後，已從本月高位92.6元跳崖下跌，到昨日已累跌11％，而且日日跌彈都唔彈，好似仲未止瀉。當日見到佢出業績跌5％去追沽佢，都仲可以食到胡。
強股逆市起勢升
中環茶友話，雖然業績好股價升業績差股價跌，本是市場規律，但投資者好多變咗驚弓之鳥，升跌幅度放大晒，投資者一聽到公司業績有乜風吹草動就不問價沽，以前都會等吓反彈才沽，而家半日都唔想等，套現避入業績好的股份。
電訊股較好是聯通，電腦股是聯想(992)，呢啲股都係曾經跌過，但結果聽到好業績都上番去。另外有些股票更是易升難回，例如科技股騰訊(700)、內房股中海外(688)、本地地產股長實(001)，沿着上升軌向上，資金係抱寧願買貴，唔好買錯的心態，不斷追入這些業績較佳、前景較好的股份。散戶一見大股有好業績馬上追入，攀車邊都可以走一段。
茶友話，強股走勢逆市走強，係和基金有強烈避險心態有關，佢哋而家睇業績睇得大過天，你業績好我貴啲都唔怕買，至少唔會跣鋪直。
基金好怕買咗業績差股，或者隻股突然爆鑊出來，走都走唔切。雖然我好唔鍾意用呢句話：「炒股唔炒市」，但最近的確有此現象，強者愈強，弱者跳崖。
陸羽仁
上一頁 下一頁
金融High Tea 舊文
