金融High Tea——伯南克期權
2012年8月27日
新華社
全球資金水浸，但美國經濟升唔起，今年第2季經濟增長只有1.5％，搞到聯儲局又話要放水，聯儲局上周四公佈8月會議紀錄，透露儲局成員不滿意美國經濟狀況，認為除非未來的經濟數據指向經濟有實質而持續的復甦，否則好快就要推出新增的貨幣刺激措施，其中一樣本來差不多要推出的措施是將低息期，由而家據講的2014年再推後。
好多美國交易員都覺得美股唔應該升，但我上周睇到一個資料都幾有趣，美國標普500指數今年已升了14％(上周數字，如今略回)，升近4年高位，炒股的對沖基金就大鑊啦，據BarclayHedge的調查，佢追蹤的736間股票對沖基金中，只有81間有14%或以上的回報，即係只有11%對沖基金跑贏大市，89%的基金唔掂，好多芬佬睇錯市。
6、7月歐債危機升溫時，好多人大手沽貨，但8月2日歐洲央行開完會後，環球股市止跌回升，美股升歐股升，只有中國股市在低位浮沉，無乜升跌，這一浪升市，成為好多芬佬的死亡陷阱，追蹤這一個升浪的第一個原因，是預期歐洲央行將會出招，盛傳的招數是由歐央行訂出歐羅區國家的債息指標，若然實際債息高過指標，歐洲央行就入市買債拉低那個國家的債息，傳聞歐央行買債幅度無上限，若然真係公佈這樣一個方案，勢必再夾升股市。
環球股市上升的第二個因素，就是預期美國聯儲局將會推QE3(第三輪量化寬鬆)，呢個因素對美股影響最大，股市跌都無人敢追沽，因為有所謂「伯南克期權」存在。呢個世界當然沒有真正的伯南克期權，但聯儲局的政策，等如伯南克開出認沽期權，你買股票跌咗，跌咗可以沽畀佢，佢多多都接，叫大家放心去賭，你唔賭就笨啦。
美股天堂國貨地獄
即使美股交易員，都認為市場扭曲，佢地睇到兩種問題，第一係美國經濟只有1.5％、2％的微末增長，股市卻升近4年高位，唔知想點。第二係美國巨企股價創4年新高，但中國股市卻創4年新低，情況古怪，需知好多美國巨企的生意增長主要靠中國這些新興國家，無理由中國唔掂佢哋掂。
當然，中國股市封閉，外國人不能到中國買股票，理論上有可能美股高過國貨，但都無理由美股在天堂內地股市在地獄。美國人也相信，問題不在中國，問題在美國，美股咁強，升到無人信，無人覺得現在的經濟狀況值得升上4年新高，關鍵是「伯南克期權」作怪，有佢包底，好多人就在如今經濟差勁的日子都夠膽買股票。
路透社一周前做了個針對交易商和經濟師的調查，發現有高達60％的受訪對象相信聯儲局會在9月會議推出第三輪量化寬鬆，但他們同時調低今明兩年的經濟增長預測。這是這個調查首次有超過50％受訪者相信有QE3。美國上一輪量化寬鬆金額是6000億美元，累計推了2.3萬億美元量寬計劃。市場估今次QE3規模只有5000億，即係比上次略少。不過無論如何，呢個「伯南克期權」正在投資市場發揮神奇功效。
為求避險愈貴愈買
美國大量放水救市，將要全世界為佢埋單。由美國為中心引發的全球水浸，逼人攞錢去投資，伯南克第一個目標是推高美國長期國債的價格，令相應的債息下跌，所以第一個炒起是最「安全」的美國債市，然後係美國股票(上四年高位)，然後係美國東西岸大城市的樓價(紐約、三藩市、洛彬磯貴價樓和高位相差不遠)，資金湧出美國，黃金、石油等稀有商品都炒起(如今在和使用需求不匹配的中高位)，資金湧到全世界，環球大城市樓價都貴到飛起。
熱錢既「被迫」炒作，但實際上又知道經濟差好「騰雞」，所以老是想找相對安全的投資對象，就誘發好多天堂與地獄的故事，除了美股天堂、國股地獄之外，還有港樓天堂、港股地獄，甚至一個股市之內，亦有績優股天堂、債差股地獄等等。
你可能會問：有錢賺的東西價錢升到天堂，無錢賺的東西價錢落到地獄，乜唔係好正常嗎？我話兩者有點差價唔出奇，但差價太大唔理性，唔好講地獄股，只講天堂股，例如話佢地係內地零售消費股會抗跌，炒到30、40倍市盈率(PE)，我就話買呢啲股長揸係搵命搏，想當日資金熱追內地體育股，大買李寧(2331)，令佢一度升到天上，如今李寧話可能會轉虧為盈，股價跌落地底，零售股真係咁安全？
在伯南克期權的誤導下，在過度的避險心態指引下，就出現好多貴者愈貴的錯價(平價可能接近真實一點)，買貴樓的道理都係一樣，而家你見到眼前的股票價殘，樓價貴，就會覺得股票是很差的投資，買樓是很好的投資，相信股價會再跌，樓價會再升，結果買完樓一兩年可能好開心，因為價格還在漲，但再長一點時間，樓價開始跌時，就發現這是一個10、20年的負債。好像年輕人要結婚，覺得無樓不成，到將來發現市面上的新樓仲平過自己供緊間舊樓時，又會問點解當日唔租樓住就算。
低息放水終有盡頭
既然存在伯南克期權扭曲價格，不妨講吓順住這個「期權擔保」的概念去買嘢有乜風險。
第一，伯南克期權用盡。所有事物皆有盡頭，債券大王格羅斯斷言伯南克出QE都改善唔到美國經濟，出到QE3、QE4、QE5慢慢失效，伯南克期權用盡都救唔起經濟，美國經濟衰退的效應會幅射出外，令所有貴價資產最後都會回落，這就是所謂「日本模式」，但美國經濟對全球的影響就大得多，資產價格會硬着陸。
第二，伯南克期權到期。當然，另一個結局是伯南克成功救起美國經濟，美國因為經濟好通脹重臨而加息，對環球投資市場都有壞影響，但這已是最好結局，因為經濟好利息上升，資產價格有望軟着陸，回吐都唔會太大。
第三，長遠回歸價值。其實唔使理過程發生乜事，所有投資產品，長遠都會回歸價值，好似香港股價平、樓價貴，唔係股票平咗，就係樓價貴咗，若然樓價貴得有理，香港、內地經濟最終都變番好，股票應該會升番上去高位。若然經濟前景真係唔好，股票只值咁多，或者多少少，樓價就係貴咗好多，終會回歸價值線，理由多種多樣，可能係美國加息、政府加供應、或者歐羅崩盤，都無所謂啦，若是泡沫，最終都會被某些刺針刺破，升得愈急，跌得愈快，所以買咗貴嘢想揸佢10年、8年，佢回歸價值線時會就會好痛。
芬佬甚至一般投資者追逐熱門貨「避險」的狀況，短期還會繼續落去，但長線投資要搵價值，好多地獄股若有不能替代的核心競爭力，暴跌後價值顯露，但買咗佢哋短期好可能會繼續跌，佢哋跌到好似剩一個煙頭咁樣，但1吋半煙頭再燒半吋，你都會痛到入心，唔係咁易捱。
陸羽仁
上一頁 下一頁
金融High Tea 舊文
