金融High Tea——大市底子硬
2012年9月20日
■昨日金礦及相關股份全線炒起，當中以中國黃金國際表現最勁，由7月尾開始發力，當時股價18.74元，昨日勁升8.5%至33.65元，兩個月內抽升近八成！資料圖片
昨日港股在10點幾左右開始抽上，早幾日上落市恒指去到20700點上下就行人止步，但昨日一舉衝穿呢個位，收在近高位20841點，升咗239點，成交亦增至637億，扣除龍湖(960)批股的31億後，仲有600億以上成交，大市熱度有少少升溫。
大市上升，搵得到的利好消息係日本央行宣佈擴大量寬，日本見美國QE，唔想日圓係咁升，加入擴大QE的行列。消息公佈後日圓匯價應聲下跌，美元兌日圓一度升至79.21日圓，接近一個月新高。不過日本QE日股都係升1.2%，點解港股又升1.2%，環顧區內股市無一個有日本升咁多，內地上證綜指都只係升0.4%，港股都係硬得可以。
中環茶友話，昨日紅色巨股升幅厲害，共8隻內地電訊股、內銀股、內險股、石油股好多升幅都在2%以上，夾埋帶動恒指升140點。
散戶沽基金買
茶友話，呢啲紅色巨股都比較落後，昨日大戶、大基金買貨多，散戶買貨少。佢話散戶在大市升到8月高位20300點左右，已經急急沽貨，而家手上貨唔多，大市升亦唔係幾關散戶事。按過住經驗，散戶沽咗貨，個市反而仲有得升，係升到散戶都唔信要追入接貨時，個市才會回，而家大市底子幾硬，後市睇高一線。
而家細股都開始有啲癲，部份殼股開始亂炒，呢啲係高風險遊戲，參與時要睇路。
講到概念股，反而同美國印銀紙同QE有關的概念股真實啲，錢多了，金銀、銅、鐵、物業要升，資源股全線發力。當中尤以保值能力最強最流通的黃金最被看好，過去以為美國再QE都係用多5000、6000億，睇好黃金都只係覺得佢會再上高位1900美元就行人止步，如今係無限QE，市場亦要重新估計，保守啲係大摩只睇到今年年底金價上1800美元，但進取者如美銀，昨日預期到2014年底黃金會衝到2400美元！
金礦及相關股份全線炒起，當中尤以中國黃金國際(2099)表現最勁，由7月尾開始發力，當時股價18.74元，昨日勁升8.5%至33.65元，兩個月內抽升近八成！招金(1818) 及紫金(2899)亦十分強勁，昨日齊升約5%，過去兩個月同期升幅達到55%及39%。金股和金價比價，升跌都多好多，金股進入一段狂炒期。
黃金股升到癲
月初瑞銀出報告指，內地樓市銷售勢頭穩定增長，一二三線城市8月份按年上升50%。「金九銀十」市場開始進入傳統銷售旺季，首選碧桂園(2007)、世茂房地產(813)及龍湖(960)。龍湖股價由8月中升至上日的12.9元，抽高17%，點知佢抽高就批股。
龍湖現時手持近175億元人仔，一點都唔手緊。市場解讀係龍湖高層對阿爺樓市政策仍存有戒心，想保留更多資金。除龍湖外，內房股近日集資不絕，上周已傳出佳兆業(1638)有意發行總值約19.5億元債券，連同路勁(1098)、富力(2777)及華潤置地(1109) ，先後所發的票據及簽訂的銀行貸款，兩個月合共集資達130億元。受供股集資影響，龍湖昨日大跌8.7%，低過供股價。富力及華置跌超過2%，看來內房股抽水潮未完，批股前通常先炒起，升得急的內房股要小心佢伸手。
陸羽仁
上一頁 下一頁
金融High Tea 舊文
