金融High Tea——呆佬行大運
2012年11月22日
中港股市近日同氣連枝，昨日齊齊有神奇表現，內地股市突呈「V」形走勢，高開後反覆尋底，上證指數午後曾低見1995點，不過低位有買盤大量湧入，消息紛傳是「國家隊」進場，拉動A股扭轉跌勢，並以全日高位收市。幾乎全線板塊上升，內銀股及內險股升勢強勁，石油股、內房股亦大幅上揚，港股午市同告愈升愈有。
又靠國家隊傳言頂住
內地股市引發國家隊進場，皆因市況明顯有異動。上證指數本來再度試底，午後曾低見1995點的逾四年低位，但接近2時突然有大量買盤湧入，上證指數直線抽升，結果收報2030點，升21點，深成指數收報8150點，升98點。
由於市傳國家隊進場，加上又話人行決定於11月25日起下調存款類金融機構人民幣存款準備金率0.5個百分點，人內銀股急漲。建行(939)漲3.4%，收5.84元；交行(3328)升3%，報5.54元。兩股成為藍籌升幅榜冠亞軍。
近日內地股市回調，主要是十八大塵埃落定，市場預期會出現一段政策面和數據面真空期，直至明年二、三月，中央的經濟政策才會逐漸明朗化。就算以調低準備金的傳聞嚟講，市場都係半信半疑，主要係資金流動狀況來說，降準的機會並不高。
不過，2000點係重要的心理關口，一到呢個水平，預測政府護盤的消息就會出現。
喺內地股市推動下，港股尾市買盤湧現，推升恒生指數曾升逾300點，收報21524，飆296點；國企指數收報10397，升170點，成交金額增加至524億元。
港股勝在估值唔貴兼且有資金，本身沽售壓力唔強，跌咗兩日就會彈一彈。
中環茶友話，呢種市況選股好重要，因為唔好彩買中隻急跌股，咁就賺埋唔夠一鋪清袋，故此你會見到資金傾向流入穩陣的股票，好似房託基金，以前個個股民嫌佢呆，但近年大家就鍾意佢業務簡單，又講明派息，於是由領匯帶頭，幾隻房託不斷創新高，變成呆佬行大運。
銀基主席減持有啟示
相反，曾經刺激過的消費股就紛紛中招，白酒股近日行衰運，代理五糧液的銀基(886)被主要股東彤叔減持，加上業績轉盈為虧，股價持續受壓。
銀基作為五糧液酒系列的最大經銷商。除五糧液酒系列外，同時經銷威士忌，銀基上市時正值內地消費概念大炒，但近半年內地白酒股開始行衰運，連龍頭股茅台都受銷情下滑影響下跌，見到咁嘅形勢，其他白酒股當然無運行，股價回落似乎係遲早的事。
銀基本身做經銷，受市場波動影響仲直接，早前銀基主席梁國興配售半成股權，每股作價3﹒22元，導致股價急挫，基金西京等曾經增持。
前日彤叔減持1558萬股，昨日公司預告業績轉盈為虧，彤叔又賣股，公司中期業績將於下周五(30日)刊發，雖然股價比起一年高價7.1元已經跌咗唔少，但係揭盅前都係少沾手為妙。
銀基係近幾年內地奢侈品股的典型，中央大力放水下，早幾年高級消費市場一片興旺，好多呢類公司上市集資，股價熱炒，管理層在攞到平錢後大力擴展博一舖。今年起內地消費退潮，好多急速擴展的公司面調困局，捱唔捱到下個春天來臨，要睇公司財政狀況，但銀基主席就好醒目咁自己吸定水準備過冬嘞，所以有時睇大股東動作，點都會睇得出一啲微言大義。
陸羽仁
上一頁 下一頁
金融High Tea 舊文
