金融High Tea——樓市代替品
2012年12月4日
上個月港股表現不俗，有講話係人保上市維穩效果，這個說法唔知真唔真，但係人保招完股，中港兩地金融股就真係碌低，成為拖累大市向下的主要力量。匯控(005)算係比較硬淨，昨日跌0.6%至78.25元。上周炒收購概念，一度爆升11%的創興銀行(1111)，昨日表現最弱，跌番近5%。中資金融股「5保9行」全部向下。內銀股以交行(3328)跌得最多，跌2.3%；保險股以太保(2601)最弱，跌2.6%，人保招股反應不俗，睇吓掛牌係龍定鳳嘞。
單日轉向要留意
跌市中弱股被人質到散，近日跌到開巷的銀基(886)又見低位。上月下旬，銀基發盈警，大股東彤叔及梁國興則大手減持，基金經理劉央則猛掃，上演一場大戶鬥法。後來銀基公佈業績，上半財年收益2.35億元，按年下降85%，主要業務錄得虧損1.77億元。相對去年同期純利4億元，表現完全走晒樣。銀基股價昨日急插5%至2.31元，大戶鬥法已有初步結果。1年前，銀基股價超過8元，走唔切之小股民都好傷吓。
昨日股市出現一個回吐陷阱，內地11月份官方及匯豐中國11月份製造業採購經理指數(PMI)均見擴張，反映經濟轉好，帶動港股昨日早段一度造好，高開後最多升過132點，一度升至22162點的1年高位，但內地股市唔得拖累香港，恒指午市開始轉升為跌，失守22000，跌幅逐步擴大，曾倒插近400點；最終收報21767點，下跌262點，比內地上證綜指跌1%仲要多，而且成交額增至537億元。
中環茶友話，若係圖表派，昨日港股走勢真係差，首先係單日轉向由升轉跌，唔係吉兆；其次係拉長啲睇番3個月走勢圖，昨日高位22162點，和上月5日高位22141點差不遠，但一掂高位就急回，圖表上和上月高位形成一個雙頂，雙頂回落唔係吉兆。茶友認為港股最好唔好再跌得太深，回升亦要上穿高位，否則確認雙頂，將要深度調整。
麗展興業折讓大
跌市中最搶鏡係隻麗新發展(488)，大升16.5%收0.29元，麗展自上周獲將軍澳地皮後，股價連升3個交易日，昨日以高位0.29元收市，創52周新高。同系麗豐(1125)亦升8%。
麗展夥拍新地(016)大哥郭炳湘以28.3億元投得將軍澳地皮，每方呎樓面約4929元，近5000呎價本來唔平，加埋發展成本、財務開支賣唔到每呎7000元隨時要蝕，所以有人話擔心麗新投地係點着「藍燈籠」。不過你唔好理，麗展股價一直大落後，佢9月時仲係0.14元，而家炒高咗1倍，市值都只係58億，資產淨值高達164億，股價對資產值都仲有64%折讓，要炒落後都有理由。
中環茶友話，而家買住宅要俾買家印花稅，住宅無得炒，大地產商你都驚佢賣樓唔得，呢啲中小型發展商本來都無乜樓賣，所以唔使理佢短期內賣唔賣到樓，只係炒佢相對資產值有大幅折讓，都可以當作炒樓的代替品。你睇隻香港興業(480)，近排都升得好靚，佢市值只有54億，但資產淨值有145億，股價對資產淨值有63%折讓，亦由9月的2.9元，升到而家4.01元，所以呢期炒折讓大的地產股，都有排炒。
陸羽仁
上一頁 下一頁
金融High Tea 舊文
