金融High Tea——大行也短炒
2013年1月4日
■昨日鐘錶珠寶股發威，周生生大升12.8%至21.05元。資料圖片
■六福亦升8.3%至27.4元。資料圖片
股市強的時候真係無嘢好講，好似昨日，大市上半場都係先升後回，但到兩點左右歐洲佬瞓醒就回魂，最後現貨升86點收市，期指尾段夾上過百點，升223點收場，大市成交有893億，仲有芬佬在買貨，但市勢升得過急，慎防隨時回吐一下。
大市昨日仍然係紅色股天下，內銀在升，內房在升，本地銀行股普普通通，本地地產股仲要跌。政府出咗徵買家印花稅辣招之後，上月住宅成交只有3286宗，是08年金融海嘯以來最低，按月跌53%，樓市成交冷凍中。
《施政報告》 樓市懸劍
特首振英哥在1月16日公布《施政報告》，距今唔夠兩個星期，市場開始怕佢又出招搞樓市，所以提早避一避。我覺得早兩個月出咗買家印花稅同加咗特別印花稅，短期打擊炒樓措施出得差唔多，若有負面嘢要睇政府會唔會大力加供應，不過土地難搵，所以長線唔易有招，《施政報告》仍如懸劍一樣，對本地地產股有壓力，暫時宜按兵不動，等到《施政報告》無料到就入市炒一轉。
昨日鐘錶珠寶股發威，周生生(116)大升12.8%至21.05元，六福(590)亦升8.3%至27.4元。珠寶股有運行，皆因大行摩根士丹利唱好，睇好的六福及周生生昨日成為領漲先鋒。
大摩在報告中話，由於珠寶股上年的業績基數比較低，預計行業銷售增長今年將再度加快，行業悲觀因素已被消化，正是投資時機。大摩認為這個板塊「吸引」，它在行業中首選六福，評級「增持」，目標價31.6元；而對周生生「增持」周生生，目標價24.6元。
大摩選股手法都好簡單，揀兩隻市盈率較低者來推介，即使大升之後，周生生市盈率只係13倍，六福更只是11.3倍，相對之下，大大隻的周大福(1929)市盈率19.3倍就高得多，周生生和六福相對平，大市好，有得炒。
大行揀股，好多時講基本因素，珠寶股或許比去年第三季最差時有改善，但係唔係咁好景就真係好難講。業內人士話，鋪租勁貴，但內地豪客買名錶珠寶的生意雖有反彈，但遠未到大好的水平，令人懷疑2011年可能見咗頂。
以升得最多的周生生為例，去年中期賺4.4億，跌咗11.5%，究意去年下半年業績好唔好得過上半年？若然好唔過，全年業績只有倒退，去唔番2011年賺10.5億的高位。周生生一年高位是2月造的21.5元，大市早已大幅升穿去年高位，斷估無痛苦，周生生上吓高位追吓落後都唔係好奇，到業績出來即使唔係好得，都已經係後話。
珠寶金行 易炒難揸
所以我話，大行雖然講好多基本分析，實際上可能只係睇住年頭市旺，睇住行業中較為落後的股份，出報告推介一下，實際行為和短炒無異，只要個市相就，股份去得到目標價，你唔走你自己笨啦。
揸長線唔睇基本因素，人云亦云，好易坐艇，珠寶股可能係呢類，小心行業高峰已過，特別係本地生意那部份。但炒股如果只睇基本因素，唔理市況，可能又變得乜都唔使買，因為好多時都未到基本因素發揮作用，隻股已經炒上散埋水，過度冷靜，都唔啱熱情的股市。最後的建議是若珠寶股繼續熱炒大升，不妨逐步減持，我唔覺得佢的基本因素唔係好得咁緊要，易炒難揸。
陸羽仁
上一頁 下一頁
金融High Tea 舊文
