金融High Tea——賺錢生意政策市
2013年2月1日
■財爺曾俊華在立法會話，如果樓市升得太急政府隨時再出招。
大市在期指結算過後悶悶哋，恒指小跌92點，但內房股卻全線急跌，皆因內地有消息話北京將徵收房產稅，令內地內房股A股急挫，拖低本地上市的內房股。
內地《華夏時報》引述接近北京財稅部門消息人士話，「北京房產稅試點方案已經上報到國務院相關部門，就等待批覆了，如能獲批，最快在今年上半年就會實施。北京上報的方案建議，對本市居民家庭給予人均24平方米的免稅住房面積(指室內面積)作扣除額，目前上海的免稅面積為建築面積60平方米，由於北京寬免面積較少，方案更加嚴厲。
消息出街後，北京市地方稅務局在官方微博上作了溫和的否認，話北京市地方稅務局經調查證實，該局工作人員沒有接受過《華夏時報》記者的採訪，尚未接到上級部門有關工作部署的通知。
中海外跌得深可短炒
北京地稅局不是話絕無其事，只係話消息出街唔關我事，確實令人懷疑真有其事。一早開始下跌的內房股A股見完北京地稅局的澄清都止唔到跌，龍頭股萬科A股重挫5%。
香港內房股自然要跌，不過無A股同業跌咁多，中國海外(688)跌2.2％、華潤置地(1109)跌2.5％，佢哋無萬科跌咁多，估計係因為香港內房股早已回落一段時間，而內地內房股近日回吐不多，所以一跌就跌得深啲。
昨日傳出的北京房產稅唔係打死樓市的重招，限購令先至係，目前上海和重慶兩個城市已開徵房產稅，唔覺得樓市特別差，北京徵房產稅是遲早問題。
地產股賣樓少有壓力
有朋友?家仲想炒股，我話不如炒中國海外，佢現價市盈率13.1倍，息率1.5厘，去年中期賺84億元人民幣，升17.7％，中期升全年純利亦有好大機會再升，明顯抵過市盈率16倍的潤地，潤地去年中期盈利只升2％，推算全年純利升幅有限，難怪中國海外走勢靚啲。
中海外呢個月高位25.6元，?家24.05元，高位回落了6％，10天線跌到50天線附近，按過去經驗，佢去到呢啲位差不多要反彈，買入短炒10％止蝕，博升10％走人，1博1都有少少值博率，因為若中海外跌到10％打靶位即21.6元，佢上升軌破壞晒，若然跌到咁，我估唔止佢，大市都差不多要轉勢，暫時睇升10％機會大過跌10％。
香港地產股都唔掂。長實(001)及新世界(017)跌超過1%，信和(083)及恒基(012)跌超過2.5%。恒隆(101)公佈去年純利升98%至61.78億元，勝市場預期。未幾瑞信發表短評稱，恒隆地產扣除一次性出售收益，核心純利只有40.3億元，按年增29%，低於該行預期4%，維持「跑輸大市」，目標價24.7元。
恒隆走咗入內地做，本港地產業務比例不高，業績對地產股指標性不強，倒是財爺曾俊華在立法會話，如果樓市升得太急政府隨時再出招，就令地產股急跌，反映香港地產股都受政策市影響。
陸羽仁
上一頁 下一頁
金融High Tea 舊文
