投資的天空：散戶指標唔樂觀 - 張士佳
筆者先前提及新能源股如太陽能及風電股等，大多有概念卻價值不足，只係適宜投機，估唔到今個星期好似突然無曬幻想，升得越多，跌得越勁，例如興業太陽能(750)上周最高曾見10.38元，但最近低位已是6.95元，短短一周已跌逾三成。
其實在眾多太陽能股中，它已算是基本因素較好的，可是大戶沽起上?，都唔理咁多，反正沽極都還有盈利在手。
不過，這個洗倉潮對基本因素較為實在的燃氣股及頁岩氣股，暫時影響不大，昨日更有數隻燃氣股破頂，如果要找個原因，只可以話係資金不願完全放棄新能源板塊，所以沽出有概念溢價的板塊，轉投至燃氣股。
筆者早前講過，這兩個板塊都係自己的心頭好，所以先前減持股票時，仍保留在手，但若要比較兩者，燃氣又會比頁岩氣更穩陣，頁岩氣的炒味濃少少，有時走嚇位都得，燃氣自己就會長坐。
至於大市，昨日期指跌至近22200之後反彈，而近日跌幅較大的個股亦見彈力，撇除配股因素，成交亦有所增加，當見到以上現象，通常就會有投資者博見底，但是，以圖論圖，過往以陽燭來做底的次數不多。
大市暫難言見底
富經驗的投資者都知，跌市通常是以恐慌性拋售的日子結束，以現時的形勢，只可以話有利反彈，暫時難言見底。
另外，近日散戶大多仍是問可唔可以買貨，代表好多人的購買力仍未消耗，若以散戶做指標，似乎唔多樂觀。
唯一較好的訊號，是之前股跌市不跌，而大市現在也跌了不少。總之，大方向仍是看好，但這段就要非常有耐性地部署。
張士佳
元大寶來證券(香港)業務及商品發展總監
與曾卓鋒(元大寶來證券(香港)客戶經理)聯合執筆
(逢周三、五刊出)
上一則: 青心直說：強國人媚外捉蟲 - 胡孟青
下一則: 炒友Blog：4G大建網中興受惠深 - 邱古奇
投資的天空 - 張士佳 舊文
