金融High Tea——五萬點嚟到至講啦！
2013年3月21日
港股昨日反彈214點，無乜人講，但呢兩日茶餘飯後好多人問我，點睇摩根士丹利話港股在2015年可見5萬點。我第一個反應係昨日升幾多先，跌咗咁多反彈200幾點，升得1%，內地股市仲要升2.7%咁多，可見香港都無乜人聽大摩支笛喎。
大摩分析員Jonathan Garner在報告中列出的四大原因估恒指有條件升咁多，包括：一、發達國超寬鬆貨幣政策，加上中國及環球經濟恢復增長。二、港股過往每隔6至8年會升至高點，上次高位2007年，8年後即2015年再升上高位到5萬點，較上次高位高出58%，符合過往模式。三、目前港股市盈率11倍極偏低，若回歸平均市盈率倍數，再加上三年後的盈利預測，可見5萬點。四、內地合資格境外投資者(QDII)計劃擴充，加上港府打壓樓市會令資金由樓市轉投股市。
我就話每一個條件都似層層，但係夾埋一齊就唔覺得恒指5萬點會發生。我話恒指若要見此高位，前提係美國繼續日日大放水，兼且中國低通脹高增長，過去一兩年美股大升港股落後，就因為兩個條件只中一個，美國係大放水，但中國高通脹低增長。要兩個情況同時發生，絕對唔易，因為美國大放水根本就會引出新興經濟體高通脹，從而要收水壓抑咗佢地增長，內地唔好香港點樣5萬點？
央行未見高明決策
中環茶友提出另一相關觀點，話家全球睇住聯儲局主席伯南克和一眾央行點玩，問題係伯南克知唔知自己2015年點玩呢？佢估就唔知啦，都係摸着石頭過河，唔通大摩知得多過伯南克？仲有仲有，唔好以為大國央行行長好勁，你睇塞浦路斯呢啲抽存款稅的「好橋」，都可以在歐洲央行眼皮底下諗得出來，或者係德國私心太強迫人搞啩，總的來說央行行長決策質素唔係咁高，明年世界經濟係點都唔知，所以講到5萬係唔係早咗啲呢？
我就保持一貫作風，有苖頭先至講啦，港股成交都未上1000億，恒指唔好話未上高位，連2010年11月高位24988點都穿唔到，講乜鬼5萬點？
另一方面，日前央行副行長劉士余公開表示，「未來10年國有資本不應該在國有銀行保持這麼高持股比例」，隨即被市場解讀為國有大股東有意逐步減持國有銀行。按本周一收盤價計算，目前僅財政部與匯金公司持有的中資銀行股總市值就超過3萬億元，如果保持50%控股權測算，國有資本從國有銀行減持規模也高達7800億元。再加上摩根大通唔係好似摩根士丹利咁唱好，建議投資者減持內地股票，並沽空內地四大銀行的衍生產品，搞到中資金融股本周初插完又插。
內地券商唱好內銀
昨日內地券商出招還擊，招商證券首席分析師羅毅稱，今年銀行股會有20%以上超額收益。原因有三個，首先是銀行業績穩定增長。今年貸款需求較去年年改善明顯，預計全年新增信貸在9萬億左右，較去增長逾14%；行業全年利潤由8.5%上調至12%。
其次係中國證監會近期明顯加快引入資金步伐， QFII、RQFII擴容每月將超85億美元，資金流入增，有利銀行業。全球主要資本市場，在經濟快速增長階段，銀行的PB(市淨率)估值都在2倍左右。新興市場國家的銀行股估值相對市場平均估值更有40％溢價(即市淨率2.8倍)。但據招商估計，A股銀行板塊2012/2013年動態PE(市盈率)只有6.5/5.9倍，動態PB只有1.2/1.1倍，未來有巨大提升空間，建議投資者趁低吸納銀行股，首選民生(1988)、興業、浦發、寧波。
內地券商唱好，內銀股A股昨日大幅反彈，香港H股也受惠，其中民生及中信行(998)抽高超過半成，重農行(3618)飆升7.3%，工行(1398)、建行(939)、中行(3988)及農行(1288)齊齊反彈超過2%。我就話跌得多會彈，都係自然現象。
陸羽仁
上一頁 下一頁
金融High Tea 舊文
