金融High Tea——腦靜手快
2013年4月23日
四川雅安蘆山上周六發生七級地震。地震造成傷亡及經濟損失，投資市場有人歡喜有人愁，個別板塊借機炒作。初步睇嚟，今次地震規模同破壞，同汶川地震相差好遠，相信對股市的影響都係一樣，不同板塊借機異動，部份係本身股票已經想炒作，同地震無關，部份只係利用機會走一轉，呢類股份相信好快打回原形，跟風者要頭腦保持冷靜外，仲記得要手急眼快。
好似醫藥股今年已經炒開，呢次係炒地震需求，內地醫藥板塊逆市升1.7%。本港藥股普遍炒高。以生產注射用腦蛋白水解物嘅天大藥業(455)最癲，大幅抽高近一成，遠大醫藥(512)漲7.8%，利君國際(2005)及華瀚生物製藥(587)升3.7%及2%。
靜市要識食胡
災後要重建，水泥及鋼鐵等建築材料股齊齊造好，水泥股以業務位於災區附近的亞洲水泥(743)及西部水泥(2233)，齊升約5%；重鋼(1053)及馬鋼(323)表現更好，抽高近6%，呢類股份就多數似係利用藉口炒吓反彈而已。
鋼鐵股之所以造得比較好，另一原因係有內地媒體引述工信部今年將成立鋼筋產品認證機構，推薦符合《鋼鐵行業規範條件》的鋼企，淘汰不規範企業。力爭到「十二•五」末將約80%的現有鋼鐵產能納入到規範管理範疇，之後將出台政策支持規範企業發展。中央開始落實此前提出的以合併及重組鋼鐵行業，以改善產能過剩問題。鋼鐵龍頭企業自然受到追捧。
中資保險股因索賠憂慮遭殃，除了太平保險(966)因重組獲批，獲德銀唱好，維持「買入」評級，股價逆市升3.5%外，其餘全部向下。以太保(2601)及財險(2328)沽壓最大，齊跌2.3%。
內地股市未有受太大影響，上證綜指最低跌過0.5%，尾市回穩，收市微跌2點至2242點。港股午後跟住A股炒上，最高升超過105點，臨收市回順，小漲31點，收22044點。大市成交537億元，係靜市下若然有機會食胡，就要小心把握啦。
G20召開對日圓匯價下跌無大影響，日本瘋狂印鈔，平錢流出海外，曾經炒起全球市場的Carry trade又引起市場憧憬。圓匯下跌，理應利好同日本產品有關的企業，最明顯係日本車代理好似大昌行。中環茶友同日本車代理高層傾開偈，問佢幾時有價減，高層搖晒頭話無咁快，解釋日圓下跌，入口材料變相貴咗，而且係全球化下，日本汽車老早已經分散生產，成本同日圓未必直接掛鈎。
圓匯效應惹憧憬
代理商高層講法，茶友認為反映咗日本企業過去應對圓匯上升的方法，透過不同方法去減低匯價上升的衝擊，現在掉轉頭睇，日圓下跌的利好效應亦無以前咁明顯。不過，呢幾年歐洲車係香港賣得唔錯，或多或少同匯價有關。現在日圓下跌，照計點都對日本車有着數，問題係幾時反映。佢估計可能要再過幾個月，效應先至會出嚟。
日本國內外投資者借平錢炒作的威力，有無以前咁大尚待觀察。茶友話，通常投資市場會先行一步，到日本車減價之時，相關公司股價可能已經偷步上升咗，到時先買可能就變成接貨，所以有心想炒日圓下跌概念，呢排就要勤力啲做功課嘞。
陸羽仁
上一頁 下一頁
金融High Tea 舊文
