小心地滑
2013/5/24 9:26:23
網誌分類: 經濟
日本股市昨日暴瀉1143點，搞出個小股災，打擊全球投資氣氛，融夜美股定番，杜指只跌12點，今早日股反彈400點以上，升2.9%。
昨日市場對美國聯儲局可能提早取消刺激經濟措施的憂慮升溫，再加上中國的製造業數據十分糟糕，重創歐洲礦業和汽車板塊，歐洲股市昨日跟隨亞洲股市大跌超過2%。
歐股唔掂，亦影響美股開市氣氛。美國經濟數據參差，美國4月新屋銷售較上月增長2%，較去年同期則高出29%，增長幅度係經濟衰退結束以來的第二高紀錄，但美國Markit公布的 5月預覽PMI(採購經理人指數)指數跌至51.9，係去年10月以來新低，製造業繼續顯露疲軟的勢頭，反映美國經濟都唔係一面倒咁靚仔。但美股就係偏偏牛氣十足，每逢回調都變成投資者入市的借口。
杜指昨日開市頭半小時就勁插127點，但到10點就見底，好快就拗腰向上，中午前已經收復所有失地，午後更反敗為勝，有40點進賬，尾市再度回順，收市微跌12點，收報15295點，標普500指數差一些，跌5點至1651點，跌幅亦不足0.3%，跑贏全球股市。
Federated Investors首席股市分析師Phil Orlando表示，股市的下跌與聯儲局公開市場委員會的會議紀要有關。聯儲局首次討論「6月」開始削減債券購買量的問題，雖然只是部份人的意見，但都惹起關注，Orland則認為6月收水的可能性係零。尤其係全球第二大經濟體中國顯疲態畢露、歐洲仍在衰退，聯儲局在短期內很難退出量化寬鬆。即使美股出現下跌，但市場顯得很平靜，投資者亦沒有恐慌，反映市場普遍認牛市仍未結束，跌市變為買入的良機。
CNBC人氣節目瘋狂金錢主持人Jim Cramer則認為，QE當然係推動牛市的主要動力，但也有唔少的其他的因素推動這個牛市。更重要的是，這些動力不會隨時終止。
首先係美國企業盈利戲劇化地改善，成為推升大市的重要力量。他指出低息環境方便了企業再融資，企業製造更多的利潤。他認為這個形況短期沒有理由會改變。其次，好多企業在這段時間大批量回購股份，已令貨源歸邊，而聯儲局則不斷泵水，造成股票的大量需求，在供不應求的情況下，大市就會上升。第三就係美國失業情況正在不斷改善，反映企業正在增加招聘。第四，係美國房地產正在復甦。Cramer指出，房地產市場正積累了好大的需求。美國在1960年的建屋量比2009年、2010年及2011年加埋都要多，而當年的人口只有現在的一半而已。供應何其不足，可想而知。此外，汽車的銷售亦只會有加冇減，因為過去10年，唔係好多美國人買新車，而汽車一般的壽命大約係10年，好多美國人都要換新車。最後係歐洲經濟愈來愈好，對美國的工業會帶來一定的推動力。
Cramer認為，由於聯儲局的QE唔係造成今日美股牛市的唯一原因，因此，即使聯儲局對QE開刀，美股都唔會重現金融海嘯咁恐怖場面。
Cramer係好友，我無佢睇得咁好，認為若然聯儲局一話收縮QE，個市的反應會幾大，其他支持股市的因素，都係要等股市顯著調整後才慢慢反映出來，即係收縮量寛應該唔會帶來股災，但都有大調整。
問題係幾時開始收水，我唔信6月收，目前睇9月的可能性也不高。伯南克係大鴿派，若未見好明顯的失業改善數據，佢唔會收手，例如要美國非農業就業增長連續幾個月都有25萬以上，就想唔收都唔得啦，但出現這些數字不易。美國放水在股市層面太成功啦，再係咁升遲早升出泡沫，所以伯南克出來討論一下收水，其實只是吹水出口術，讓大家懷抱一些戒心，唔好炒得太過份而矣，大有「若然炒得太顛，將來唔好鬧我，我事先警告過你啦」的味道，等如「小心地滑」的免責聲明，我警告?鬻A，你唔小心跌斷手唔關我事呀。
陸羽仁
回應(3) 我想回應
陸羽仁 BLOG 舊文
