金融High Tea——情場 股場 力場
2013年5月24日
■中石化煉化生不逢時，首日掛牌撞正港股大幅回吐，上市即潛水。圖為中石化煉化董事長蔡希有。蒙俊雄攝
情場沒有無端端的愛，也沒有無端端的恨。在股場，沒有無端端的升，當然也沒有無端端的跌。近日強勢的美股，因為聯儲局會否開始「收水」玩咗一日過山車，港股就借勢連續兩日大跌，幾乎連阿媽都唔認得，箇中因由，相信唔止係外圍因素咁簡單。
聯儲局「收水」疑雲升溫、匯豐中國PMI資料疲軟、日本股市狂瀉，港股在三重利淡因素打擊下暴挫，唔夠一個小時，就連20天線都穿埋，中午前勉強重回20天線，但掂一掂就重拾跌軌，最低跌超過650點，尾市收報22669點，勁插591點，國企股仲弱雞，挫306點，大市沽壓沉重，成交急增至836億元。內地上證綜指跌27點至2277點，表現相對硬淨。
大戶發功抽水
港股跌得咁甘，但相對日本股市，只係「濕濕碎」，日股昨日表現都好神化，朝早一度升超過320點至5年半高位，下午市開始翻臉，好似食咗瀉藥咁狂跌近1500點，天堂變地獄，以全日最低位收市，倒跌1143點或7.3%，創兩年多最大單日跌幅。
ZeroHedge評論稱，日經225指數的表現不過是中央計劃開始失效的預演。日本10年期國債收益率升至1%。正如我早前講，而家擺錢係任何資產，首先係睇吓估值，睇吓佢先前升得多唔多。物極必反，日股狂升咁耐，狂跌一下都好正常。
講番股市升跌，都有背後力場，沒有無端端的起落。今個星期初恒指大升、然後過去兩日大跌，都同大戶手影好有關。五月頭港股一反例淡傳統彈起，相信同集資活動有關。先係兩隻大股銀河同中煉化上市，跟住周初高盛配售工行抽水。係大戶抽水營造力場下，港股勉力上衝，集資行動完成，大戶散功，力場消散，個市自然要跌。
中石化集團分拆的中石化煉化(2386)生不逢時，首日掛牌，開市較招股價10.5元高1.9%，其後隨大市向下，收報10.46元，以中一手500股計，未包手續費蝕20元，搞到成班老散無晒癮。
工銀認沽有需求
有中環茶友擺咗小小閒錢係銀行，呢兩日職員打電話畀佢，話有內銀股掛鈎產品，問佢有無興趣。據介紹，產品同工行掛鈎，折讓價10%，大約4.9元接貨，三個月年利率約7厘，若果做半年，年息仲可以去到9厘。
茶友計過數，若然手上有工銀，做半年先收4.5厘年息，若然接貨都買平10%，計落都幾吸引噃，問我點睇？
我就話呢類掛鈎產品，等如收期權金畀咗個認沽權人哋，而家個價開出嚟咁筍，制唔制得過自己諗，客觀現實反映係市場有好多人或者係大戶好想買入認沽權，咁樣代表佢哋睇淡工行後市，又或者至少係買定保險先。
我前一日都講過，上次高盛沽工行，喺正頂位就出貨，今次個市反彈，高盛又出招，今次仲清埋貨，所以工行今個星期初個價，有可能係短期高位，想買貨照計唔使咁急。至於跌幾多至買得過，茶友可以自己諗諗囉。
陸羽仁
上一頁 下一頁
金融High Tea 舊文
