金融High Tea——大嬸對大戶
2013年5月13日
美股屢創新高，港股呢個月以來都跟吓人哋，升破23000點，但都係追落後格局，因為大市升而成交跟唔上，都係500幾億，同年初700幾億成交無得比，證明無大資金來港炒作，大市仍然熱度唔高。從好的一方講，股市若熱起來仲有得升；從壞的一方講，港股無自己的動力，外資對買港股的意欲不強，只是用少少錢嚟炒吓落後，食番一轉。
散戶唔夠大戶玩，因為大戶睇住散戶底牌鬥，所以大戶可以出其不意，你覺得佢升，佢就跌，你覺得佢跌，佢就升，所以散戶短炒唔好鬥氣，若是玩幾日的炒作，最好順住大市行。
不過散戶通常好有意見，佢地的意見主要由過去走勢形成的，所以我地經常會見到「大嬸對大戶」的情況。早前的「盲搶金」係一個例子，最近的「搶日圓」也是另一個例子，上周日圓兌美元跌穿100大關，匯價低見每百日圓兌7.685港元，中環找換店未開門已有幾十人排隊等換錢。
金價未明 金股莫買
如果你走去買金飾或日圓，係短期內有實際需要，例如要結婚用金飾，或者馬上要去日本旅行，咁唔算盲搶，可能仲搶得合理。但有好多人買金或者買日圓係為咗投資，例如內地好多人係因為樓無得炒、股無得炒，走去買金抗通脹，問題係你在1450美元水平買金，係唔係對抗到通脹呢？
散戶行為通常比較衝動，較受過去的價錢影響，例如見慣1700美元至1900美元金價，見佢回到1500美元就覺得好抵，要搶，但對抗通脹係一個長期投資概念，買黃金真係可以抗通脹？內地長期存款利息約3厘，預計通脹3%以上，所以存款會被通脹侵蝕。問題係黃金連息都無，即係若果金價無升無跌，一年已經要蝕3%息，換句話說，聲稱買金抗通脹的人，係假設金價長期一定會升，買金才可以抵抗到通脹。
我睇法剛好相反，買金短炒無所謂，睇時機考眼光，食夠可走，睇錯止蝕。但買金長揸以為可以抗通脹，即使1400美元買咗，升到1500美元唔識走，跌番落去又唔走，最後就會重創。股神巴菲特話800美元一盎司的黃金佢都唔會買，因為黃金唔會生息，無乜價值，我就覺得散戶睇長線投資唔會叻過股神啦。黃金和美元呈反向走勢，當美國一確認經濟復甦，美元長線走勢向上，黃金就一直往下走，家無人估到呢件事幾時發生，但最終發生的機會唔細，中國大嬸在1400美元水平買咗金唔走，幾年後會後悔。
順道講兩句金礦股，好多股民將金礦股等同金價，見到金價彈走去追金礦股，其實金礦股比黃金有好大的槓桿，即係黃金升2、3%，金礦股可以升一兩成，相反跌的時候亦係咁。更有一個大問題係金礦股生產黃金有一個打平水位，而家話開金礦平均成本都要1200美元一盎司，即係金價跌到1200美元以下時，金礦大多數都會由賺轉蝕，加上每個礦的質量皆不同，質量差的金礦成本可能去1300美元、1400美元都講唔定。
可以咁假設，早年金價700、800美元時，當時的礦場一定是質素較高較易開採的。到金價急升後，連不易開採的礦場都有價值，所以礦場愈新，金礦股愈新，都可以當佢地的開採成本不低。金價回到現在的水平，已愈來愈近佢地的賺蝕交界，金價再跌，佢地就是輸錢，而且一輸就唔係咁易上番去，所以近期金礦股積弱有原因，散戶唔係想短炒博大霧，想長線投資就唔好掂呢啲股，短炒也要硬守止蝕。
唔炒泡沫 可買其他
你可能會話，股神在金價1200美元時已經睇淡黄金，信佢唔買金，咪賺少好多囉。股神避開泡沫性的投資產品，你可以話佢錯過了泡沫急漲時的升幅，但佢買其他無咁起泡的東西一樣賺錢，呢個世界好多嘢可以買，唔買起泡的東西唔使死，好似股神在1999年錯過科網股，享受唔到當時暴升之樂，但亦唔會受2000年科網股暴跌之累，你睇股神家仲係世界頭三位之內的有錢人，就知佢的投資方法，長跑下去會勝出，其他炒神或者可以賭中一個泡沫一時跑出，但長跑就好難舖舖都賭中。
出現大嬸同大戶對着幹的場面時，大嬸短炒偷吓雞或者得，但睇長線多數唔掂，好似黃金，它的升勢已出現裂痕，短期跌得太多出現大反彈當然唔奇，但彈完再向下的機會不低。日圓也是如此，愈跌愈多，若你呢個月要去日本旅行，見佢跌得多換定日圓唔拘，但唔使換太多，否則變成投資日圓，就唔係咁着數。有找換店老闆都識得講，日圓仲有下跌空間，市民毋須太心急換太多錢。
美國、日本以至歐洲都全速開動印鈔機去印錢，史無前例，全球最大的大戶都係順住呢個勢去炒，睇好美、日、歐洲股市，睇淡包括中國在內的新興市場股市，睇好美、日、歐股市係因為佢地錢多，睇淡新興股市係因為佢地有通脹難放水，匯價難貶值，通脹較低如澳洲和南韓有條件跟吓減吓息仲好啲，好似中國咁較難減息的國家就較差，出現人升中國股市唔升的現象。結果好怪，債務深重的歐洲好似無事咁，經濟有癌症的日本又好似無事，增長好慢的美國更加無事，反而中國好似好大件事，甚至惹來狙擊。
狙擊渣打 沽空圖利
既然老外主調睇淡中國，所以沽空中國就係可玩的課題，甚至買美股沽中國股，就成為「套利」題材。好似出報告玩沽空的渾水研究(Muddy Waters)，最近就表示已沽空了渣打(2888)，主要也是因為中國等新興市場的因素，渾水創辦人卡克(Carson Block)上周五在美國拉斯維加斯出席SALT對沖基金年會時，直指渣打的貸款質素日益惡化，卡克又認為中國經濟放緩是導致渣打貸款質素變壞的原因之一，渣打業務分佈在全球不同的新興市場，貸款組合中有好多中國相關項目，應該感受到中國放緩的壓力。
卡克又話，渣打向煤礦商Bumi主席Samin Tan提供的10億美元貸款，以及向在中國進行煤氣勘探的美國遠東能源(Far East Energy)貸款3000萬美元，都是十分危險。Bumi多位創辦人發生糾紛，情況混亂，Bumi在倫敦股價去年大跌近七成，暴露風險。卡克又指渣打去年向礦業公司貸款佔總貸款比例增至22%，過份進取，容易出事。
渾水這類沽空式對沖基金，靠造淡發財，執筆時未見渣打回應，相信最後該公司都會澄清反擊。近期匯控(005)氣勢如虹，渣打已被拋離。匯控大過渣打，但渣打業績集中新興市場，以前是一個賣點，但如今卻倒過頭來成為負累。渾水開口批評渣打，顯然已儲夠淡倉，而家唱通街，希望呢招引到更多人追沽，有時世事唔係咁絕對，一間公司有個細傷口，醫吓佢本來會好番，但若果有人不斷搞個傷口，也有可能出事。
既然在西方眼中，中國變成一個問題，唔係一個機會，要改變佢地的想法，要等中國真係出到較好數據，或有重大的政策轉向，才有機會扭轉，例如中國連續出現較理想的增長數字，例如中國開始減息，又例如中國開始再推行經濟改革措施，才會令外資改觀。否則如目前一樣，大陸也好，香港也好，只是一個打晒折的升市，人升會跟升少少，但想有大突破，仲有好大困難。
陸羽仁
上一頁 下一頁
金融High Tea 舊文
