金融High Tea——泡泡哋
2013年5月28日
「安倍經濟學」被質疑成為「安息經濟學」，日本瘋狂放水同任由幣值下跌，引發債息飆升，東京股市再成大鱷提款機，三個交易日累瀉一成，不過，日本股市對港股影響一向較微，反而內地首四月工業利潤增長11.4%，港股借消息反彈。
內地前景成為市場主要憂慮，市場尤其擔心係新領導層好似無乜大計振興產業。不過，國務院同意並轉發了國家發改委《關於2013年深化經濟體制改革重點工作的意見》，被視為「四箭齊發」，估計在利率、匯率市場化、存款保險制度，以及資本項目可兌換，四項改革年內將有新動作。
內地金融業四箭待發
發改委有關負責人稱，《意見》提出的改革任務，都是當年能夠實施或者能夠啟動的改革事項。當前中國經濟正處於一個轉折的關口，通過加快改革，釋放經濟增長潛力成為各界共識。金融改革被視為推進各項改革的突破口之一，外界對「四箭齊發」不無期待，但通常呢類理論性高的消息，外界不會咁快有反應，相信要等市場慢慢消化至見效果。
由於內地處於政策醞釀期，A股無得大升，亦跌唔到去邊，喺內地股市穩住下，恒生指數中止四連跌，收報22686，升67點；國指收10753，升31點。成交縮至僅逾四百億元，是今年最奀。
由於中國以至全球經濟低迷，煤炭需求快速回落。面對困境，月初國家能源局宣佈限制高硫、低熱值煤炭銷售和進口。環保兼可減少煤炭供應，阻止煤價繼續下滑。政策對媒企係好消息，但電企就認真唔「合皮」，昨日傳包括中電投、華能、大唐、華電及國電等內地五大電力集團，聯名上書發改委，反對擬限制低熱值煤炭進口，認為不利於電煤市場化改革，並對環保作用很小。
內地電力股仍然普遍受壓，中國電力(2380)跌4%；華電國際(1071)跌3%。傳統火力發電企業唔掂，風電及核電相關企業就表現神勇，金風科技(2208)急抽愈10%至6.43元。
科網股炒味濃
雖然指數上落唔大，炒家就繼續炒股唔炒市策略，焦點係各路科網股。五月藍籌之「升」當然係科網股王騰訊(700)，佢靠中國版WhatsApp帶起科網股大升浪，同期還有大賣分拆中國版Appstore的網龍(777)，兩隻股份一大一小，係咁上衝，炒到股民如癡如醉。
十年人事幾番新，2000年的科網狂潮，話咁快已經過咗十幾年，當年出生的一代，現在已經變成中學生，喺科技年代，已係過了幾朝，當年由網站稱霸，到今日由手機領導群雄。中環茶友話，千變萬變，炒股都仲係「先升水面油」，即係先炒高最creme的優質股，然後就禾雀亂飛，最後放完煙花，高潮終結。
睇番呢輪科網熱起起地泡，騰訊首先起飛，衝破300元大關，早前公司高層宣佈換股套現，通常巨企高層手頭大把股票，佢哋睇法最保守，多數係最快離場嗰批人，到咗昨日，好多二線科企都創一年新高，好似金山軟件(3888)，然後又有股仔中青基業(1182)等借於搞電子博彩業爆上，開始大有大炒、細有細炒，件件都咁好味的情況。
科網股開始起泡，如果用飲啤酒理論，呢個時間應該最好味，關鍵係飲多兩杯要識得停手，如果唔係酒不醉人人自醉，結果往往就唔係咁正斗。
陸羽仁
上一頁 下一頁
金融High Tea 舊文
