金融High Tea——小心浪尾殺人
2013年6月14日
剛剛講起港股破位向下，恒指昨日就失守21000點，跌勢仲非常慘烈。恒指低開285點後一瀉千里，唔夠半小時就直插700點至20653點至喘定，其後跌幅略為收窄至收市跌468點，收20887點，跌幅2.2%，跌市成交放大，成交增至877億元，沽壓沉重，而家大家最關心今年個市見咗底未。另外新上市和諧汽車(3836)比上市價大跌16%至5.1元，認真唔和諧。
大家要知跌市不獨香港如此，整個亞洲區、甚至新興市場全部都跌，港股跌幅屬於中游，主要因為美國聯儲局有減少量化寬鬆規模的傾向，市場避險從新興市場出逃，借傷成毒，個個地區都中招，好多國家的貨幣匯價大跌，印尼仲要意外地加息0.25厘去支持匯價。結論係呢啲資金大潮波動，唔係一天半日的事情，所以唔好覺得事情一兩日會搞掂，過完一浪會有第二浪也。
豪賭日股斬晒倉
昨日內地股市和日股都跌得好甘。深圳、上海兩市所有行業板塊出現恐慌性拋售，上證綜指收市跌超過2.8%，深圳股市跌近3.8%，創出今年新低，內地過端午節放幾日假至昨日才有市，積埋幾日一次過跌，加上阿爺又再諮詢新股上市方案，市場恐怕停咗一排的新股上市又重啟，所以出現走貨潮。日本股市跌幅更加嚇人，全日勁插843點至12445點，跌幅接近6.4%，創本輪調整新低。其實日股只係緊跟日圓反向走勢，日圓早前跌到低見103.7圓後開始大反彈，昨日彈到94邊，我計吓數日圓從77.13起步跌，跌到見103.7回頭，中間跌了26.6圓，若回吐跌幅第一個黃金分割位0.382，即係93.57，若回吐跌幅的第二個黃金分割位係0.5係90.43，所以不能排除日圓再彈，日股再跌。
剛聽到一個古仔，香港有間內地經紀行有做日股買賣，有個客早前日股急升時追揸，玩當時好流行的「沽日圓揸日股」遊戲，佢在浪中間追入，一度贏過幾千萬，但好景不常，日股急回，破位急跌後經紀行急急幫個客斬埋倉，結果個客仲要抬幾千萬去補倉找數，夾埋輸咗八千萬，由賺幾千萬一兩個星期變倒輸八千萬，你話用孖展炒股係唔係搵命博呢？若佢上周唔斬倉，到而家仲大鑊，要蝕一億幾。最大問題係日圓跌勢日股升勢可能未完，正如我所講，日圓升番到90都只係回吐跌幅的0.5，回吐完可以再跌，日股回吐完可以再升，但個客都被人斬咗倉，往後個市升佢都無仇報咯。
睇番昨日香港個市，正路金融股跌得多，特別內地經濟唔好，內銀內險股跌得多。但匯控(005)跌得少、地產股跌得少、收息股跌得少，我估好多基金唔可以持有太多現金，所以沽較高風險的股份，向這些股份轉移，原因各有不同。
買強股唔買弱股
匯控跌0.7%少過大市，同係權重股的中移動(941)跌3.3%，呢幾個月買匯控和買中移動真係有打邊爐同打屁股的分別，我有個朋友好鍾意中移動，成日覺得佢平，昨日見佢跌到76元又打來問我點睇，我提一提佢，佢三星期前中移動略反彈到85元已打過電話畀我，話匯控升咗咁多，中移動升咁少，好唔好買啲「追落後」，我當時話「追你條命咩」，中移動落後有原因，內地又話開放網絡加強競爭，行業前景未明，中移動一定跑輸大市，夾硬叫佢唔好賣。若佢買咗三個星期已經唔見10%，所以我昨日又同佢講，呢啲市弱股會更弱，咪制。跌市就算要買股，都係低吸強股唔吸弱股，因為萬一吸得過早，弱股尾段可以跌好深，浪尾都殺人。
昨日地產股唔跌甚至倒升，長實(001)倒升1%，新世界(017)一度大跌8%見9.9元，最後大反彈收市10.9元只跌0.4%，另外領匯(823)更升2.4%。其實道理都一樣，最近地產股和房產基金早已跌到殘，投資者覺得佢哋短期再大跌空間反而有限，所以泊資金入去避險。
呢個市由三個星期前高位23436點咁急插落來，以昨日低位計插咗2700點，短期相當超賣，或會再插，但插到咁上下應該先反彈，但彈完第二浪再落先至見真章。加上大股跌較多二線股未跌得夠深，反彈完應會試低啲，若想投資目前即使出手都唔好大注，等第二浪或有更平的股票在後頭。
陸羽仁
上一頁 下一頁
金融High Tea 舊文
