金融High Tea——科網當炒
2013年6月5日
港股股缺乏方向，恒指先高後低，全日微升3點，報22285點；國企指數跌10點，收10537點。大市成交548億元，市況好靜。我估全球股市都係睇住月中美國聯儲局開會講乜，睇下對何時收水有乜暗示。上半個月都可能係失失慌，無乜方向。
雖然市傳匯控(005)將被美國部門起訴違反紐約州房貸規定，令屋主承受失去房屋的風險，但有高盛唱好，評級「買入」，股價收市升0.8%至86.5元，支撐大市。鬼佬大行睇好匯控，睇淡內銀，其實同睇好美股，睇淡大陸股的基調，一脈相承。
老美口味主導
港股動力不足，靜市中有得炒作的股份，都係跟外圍炒。正如陸羽仁上月講過，美國炒緊大數據概念，科網股有運行，昨日都係呢類股份當時得令。例如中國軟件(354)升12%，首季純利按年增1倍的網龍(777)升9%，金山軟件(3888)升8%，新意網(8008)都升3%。
中國軟件大升係有好消息配合，佢中標中移動(941)的飛信開發項目，會引入雲博產業(8050)合作，雲博呢隻股仔昨日亦升5%。
中環茶友話，市場係有口味，而家美國流行口味炒科技股、網股，有好消息的股份自然炒起，無好消息的股份都跟住郁，不過炒啲潮流股真係要日日睇住，好似去飲咁，睇吓食到第幾味菜，千祈唔好食緊糖水你都唔知。若果唔得閒睇，就唔掂好過啦！
曾幾何時，市場又好喜歡炒金屬股，特別係黃金同金股，不過今日俱往矣啦！
有「末日博士」之稱的紐約大學博士魯賓尼最近話，美股仍然會再升多兩年才爆，被戲稱為「爆升博士」(Dr. Boom)，不過對於金市前景，他仍然咁「末日」，他在唱好美股的同時卻預言，金價在2015年會跌到每盎司1000美元。原因眾多，包括第一、黃金即使在全球陷入金融危機時，也可能是糟糕的投資選項，原因一旦價格急跌，都會引發追孖展。第二、黃金在高通脹風險出現時表現最好，全球許多國家央行雖然聯手推出量化寬鬆措施，貨幣基礎大增，但全球通脹率仍然低落，黃金無運行。
黃金熊市未完
第三、黃金無法生產出任何收入，股票和樓等有收益資產表現都會超越黃金。第四、美國及全球經濟展望愈來愈正面，暗示聯儲局及其他國家央行過段時間將退出QE及零利率貨幣政策，利率將要反彈，不利黃金。第五，全球多國債台高築，好多國家可能在需要時，會拋售黃金減債。例如賽浦路斯才傳出可能拋售一小部份(約4億歐羅)黃金儲備，便引發金價大跌13%。最後，他指出黃金只係「文明時代前的殘存物」，沒有任何內在價值，主要用來對抗非理性的恐懼，今天投資環境唔及全球金融海嘯時差，所以黃金無運行。
末日博士能一下子講出咁多利淡黃金因素，唔理佢長睇中唔中，至少反映短線市場的確睇得好淡，金價昨午回軟至每盎司1400美元樓下，執筆時報1399美元，金價無力。
金礦股單睇昨日表現不俗，跑贏大市，招金(1818)升1.6%至7.62元，紫金(2899)漲2.9%至2.14元。但你睇半年就唔係咁啦，佢哋在一個完美下跌軌道中，昨日只是反彈，未似尋到底。若然高位跌兩成就係入熊市，金價從高位回落了27%，睇嚟熊市未完，市場捧一隻產品可以捧到上天，到放棄一隻產品時，又可以將佢踩落地底。
陸羽仁
上一頁 下一頁
金融High Tea 舊文
