金融High Tea——預咗會病好開心
2013年7月16日
內地昨日公佈第二季GDP，消息一如所料並不理想，但和預期一樣差，結果內地股市升1％，港股拉鋸微升0.1％，港股成交縮到461億元。
內地公佈上半年國內生產總值24.8萬億元人仔，較去年增長7.6%。其中一季度增長7.7%，二季度增長7.5%，增速逐步回落。長江商學院金融學教授周春生話，這說明目前中國宏觀經濟面臨的挑戰較大，中央有必要出招進一步穩增長措施，但一怕通脹，二怕影子銀行爆煲，手上的牌有限，所以估計下半年經濟難有大幅反彈，全年GDP增長能夠「保七」已經不錯，不過，經濟又未至於會出現硬着陸。
中環茶友講起，內地經濟第三季仍有下行壓力，問題係見唔見到底，定係要跌到第四季。中國的經濟增長真係幾差吓，若然係因為預咗而股市無跌，就等如我早前預咗自己今日會大病，到今日真係發病就好開心一樣，內地經濟咁放慢法，係唔係咁值得歡喜呢？
內銀未來有壓力
中國經濟的問題是增長動力弱，還被迫勒住去調整。阿爺上月明顯出手勒住失晒控的社會融資(銀行以外的借錢渠道)，瑞銀發表報告指，內地6月社會融資總量按年跌42%，市場預期會大降，但實際還比預期低18%。「非銀行信貸」疲弱，只佔當月融資總量的17%，遠低於1至5月的55%。
瑞銀預計，內地政府實行穩健的貨幣政策，以及收緊銀行間業務及理財產品的監管，將推高下半年的借貸成本。未來數月有銀行在貸款定價時上調短期利率，以應對第三季理財產品到期的高峰期，瑞銀仍對內銀板塊維持審慎看法，該板塊將繼續面對結構性壓力，包括管理層對理財產品和影子銀行的監管，以及未來推行利率自由化等。
我就話睇完6月社會融資量大跌，就知道點解個市早前跌得咁厲害。你知影子銀行本來係主要的資金供應渠道，同銀行可以比擬，但內地6月份社會融資規模為1.04萬億元，比上年同期大幅減少7427億元。同月內地銀行新增貸款8206億元，若用銀行新增貸款扣除社會融資收縮條數，資金供應等如無乜增長。可見阿爺打壓下影子銀行令資金供應大幅收縮，內地缺水情況嚴重，股市自然無運行。
我估阿爺雖然想支持經濟，但唔會咁快放生啲影子銀行，即使放多少少水，市面還比較缺水，所以瑞銀話對內銀有壓力無乜錯。內銀反彈不少，以最有實力的工行(1398)計，現價比早前低位4.39元彈咗12%。我就話以內地而家的經營情況睇，內銀下跌的時間和跌幅都唔係幾夠，未來反彈結束後還要調整，加上港股得400幾億成交，又唔見到外資入場，真係要起動都未有燃料喎。
網股新能源炒起
經濟唔好，只有阿爺支持的行業有得炒，國務院擬加快發展節能環保產業和促進資訊消費，推動經濟轉型升級，科網股昨日表現神勇，騰訊(700) 創上市新高，最高見322元，收321.4元，升約3.7%，是全日最大成交港股，亦係表現最好藍籌股，金山軟件(3888)及網龍(777)仲勁，分別大漲7%及6%，網龍收24.15元，創上市新高。
新能源股應聲炒起，光伏股保利協鑫(3800)就升4%，風電股金風科技(2208)更大升7%。市靜無嘢做，有消息就跟住炒幾日就算啦。
陸羽仁
上一頁 下一頁
金融High Tea 舊文
