金融High Tea——百佳何價
2013年8月22日
美國國債孳息由高位回落，美股連跌四日後回穩。投資者等待聯儲局公佈對上一次議息會議紀要，市場缺乏方向，杜指與標普500指數一跌一升。
區內股市未有繼續大插，連續兩日大跌的印尼股市暫見喘定，輕微反彈。港股相對表現弱雞，恒指昨日朝早再跌超過300點，之後跌幅逐步收窄，收市仍跌152點至21817點，連跌五日。如果唔係內地人行繼續逆回購托住A股，相信港股可能跌得仲甘，短期估計市況都係閃縮。
開盤前地產股無運行
地產股繼續係壓住大市的元兇，恒生地產分類指數跌1.6%。內地地產股個別發展，表現比本港地產股好，合景泰富(1813)、保利置業(119)、佳兆業集團(1638)都能夠逆市升，世茂房地產(813)仲升超過4%。
本地地產股幾乎全線下跌，信和(083)跌2.2%，恒隆(101)仲跌夠3%，係表現最差藍籌股。本地樓市交投疲弱，發展商手頭累積未賣新盤增加，估計稍後點都要推出應市。為了吸引購買力，相信好可能會求量多過求價。雖然新盤話平賣，好多時係策略，但係市場反應未明前，投資者態度都會觀望，好多外資行目前都睇淡地產股，故此暫時呢類股份都好難有運行。
軟件股係逆市表現最強板塊。除了有阿爺的「寬頻中國」概念持續發酵外，與市場預計阿里巴巴重新上市，可能帶來一陣炒風，不無關係。阿里巴巴老闆馬雲擁有25%股份中國擎天軟件(1297)與方正數碼(618)都勁升超過6%，金蝶國際(268)仲勁，大升8%。海天天線(8227)及潤迅通信國際(989)借勢炒上，升約一成！
和黃(013)標售百佳，傳出消息指多個財團入標，前列均為外資，中資華潤只係排係中游，即係話若然只計價錢，外資贏面極大。中資坐擁大把銀紙，又有走出去的政策需要，點解出價反而唔夠外資咁勇呢？
有熟悉情況的猛人同陸羽仁拆局，話百佳乃係民生生意，有乜風水吹動就俾人嘈到拆天，家和黃經營，有大小事件就燒到大老闆身上，故此百佳雖然成日俾人話賺盡，實情好多嘢都仲係要就住就住，故此和黃一話賣嘢，有工會領袖即係牙痛咁聲，擔心員工要換老闆無保障，你話諷唔諷刺呢？
逾200億賣得過
中資如果買咗，情況仲大鑊，隨時連貨品加價都入埋阿爺數，你睇五豐行淨係供港牛肉一樣嘢，已經俾人由年頭哦到年尾，若然係做咗超市，你話大唔大鑊先？若只講財力，華潤拍得住和黃，點會𡁻唔落，講到經營，佢喺內地都有無數間超市，實力無理由差過外資，但有咁大個包袱揹住，出價自然唔會咁勇啦。
相反，如果由外資出手，自然唔使理咁多，好似領匯上市，最先搵中國人做主席同行政總裁，結果頂唔順壓力走人，跟住搵咗個老外做主席，佢理得你日日上門抗議，租都係照加，你又耐得佢何？所以外資唔怕出高啲價，因為日後無論佢想加價裁員，向供應商開刀，鍊盡盈利，都無本地華資同中資咁多掣肘，想點都得也。
家百佳競價，最高標應該未到早前傳出三百億的高價，猛人話，先前外國傳媒講到四十億美元咁貴，好明顯係開天索價，須知百佳本地業務已經面臨瓶頸，若然唔大力咁鍊，盈利根本無乜增長空間，如果有二百幾億落袋，猛人笑言應該賣得過啦！
陸羽仁
上一頁 下一頁
金融High Tea 舊文
