怕息魔
2013/9/19 9:27:43
網誌分類: 經濟
今次跌到一地眼鏡！美國聯儲局主席伯南克臨卸任前又再給市場一個意外:「暫不退市！」，聯儲局開會後決定暫不減少買債，不會收水，對市場而言，對市場而這，這是驚喜而非驚嚇！杜指昨日在聯儲局結束會議前，牛皮偏軟。聯儲局宣布決定後，杜指好似枝火箭咁抽高230點至15700點上方，尾市略為回順，仍然大升147點至15677點，標普500指數漲21點至1726點，杜指及標普500指數齊創歷史新高。
在聯儲局開會前，市場罕有地差不多一致相信，聯儲局會宣布於9月正式開始縮減買債規模，減幅會較少，會減少約100集億至250億美元，主要原因有三點：首先係美國失業率正逐步回落，其次係聯儲局決定唔退市的話，意味住當局唔睇好美國的經濟前景；第三係伯南克希望能夠在他任內開始退市。
就失業率問題，伯南克昨日開記招時的確認同美國失業率正在下跌，但卻指出「美國經濟數據仍未足以判斷是否應該減少買債的規模。」就經濟前景，聯儲局對明年以至後年的經濟表現仍然非常謹慎，更下調了對這兩年的展望。就伯南克希望在任內啟動退市，他在記者會真有被問到是否希望在任內啟動退市機制，伯南克卻沒有回應。有分析估計，伯南克要在任內退市，只餘11月會議的機會，若不能退市他會好失望，但同樣地聯儲局作出退市不退市決定亦有好大壓力，因為他可能更怕犯下更大的錯誤，就係太快退市損害正在微弱復甦的經濟。
大量交易員以為退市必然，股市必跌，昨日主要倉位係中性至沽空，以為可以坐定粒六等收錢，結果中曬招，「偷雞唔到蝕渣米」，自然好唔高興，認為聯儲局有心靠害，無向市場發放正確訊息。
發生咁大集體性錯誤，若否定了聯儲局有心靠害市場(事實上無動機咁做)，只有兩種可能，第一是市場誤讀聯儲局的訊息，一廂情願地認為伯南克在6月講出的退市時間表(今年下旬退市)咁實古實鑿，聯儲局無論如何會啟動退市，至少係一個比較溫和的退市。第二個可能是情勢有變，自伯南克6月講話後情況已改變了。
我比較相信是後一種解釋，變咗的是債息，美國10年期債息由5月低位1.6厘，升到上高位3厘，近期都有2.8厘，咁短時間抽高1.2厘，既令美國樓市冷卻，亦爆出亞洲新興市場的金融危機，美國唔理亞洲，都要理本國樓市，伯南克係怕一減少買債，債價再急跌，債息再上3.5厘、甚至回復到2008年4厘的正常水平，咁就大鑊。
表面看若聯儲局將每月買債量由850億美元減到750億美元，實質影響好微，難道美國經濟真係咁差，買少100億都頂唔順? 債市真係咁脆弱，一話收少少水就人人掟債? 問題係講心理唔係講實質，伯南克只係出口講可能退市，債息已急升，到真係鬱手，那怕只是鬱少少，都開始了一個收水週期，難保市場不會有更敏感反應，令債息再急上，結果聯儲局窒哂手。所以我估11月收唔收水，除了睇失業率外，還要睇債息走勢，若債息還在2.8厘這些高位，聯儲局可以繼續唔鬱，若然債息回落到2厘左右的較低水平，收水的空間就較大。聯儲局無嘢怕，係怕息魔呀。
陸羽仁
回應(0) 我想回應
陸羽仁 BLOG 舊文
