五年生與死
2013/9/4 上午 09:50:03
網誌分類: 經濟
美國經濟數據續好。美國供應管理協會(ISM)宣佈，8月的ISM製造業指數由上月的55.4點升至55.7點，明顯高過市場預期的53.9點，更係兩年多以來最快的增速。配合美國商務部上周宣布因出口和商業投資改善，將第二季年度化GDP增長由初值的1.7%向上修正至2.5%，美國下半年經濟有向好趨勢。
美股假期後復市，明顯造好。杜指朝早最高升超過120點，一洗近日頹勢。
不過，好景不常，大市在總統奧巴馬發表講話後掉頭急滑，午後一度倒跌33點，到收市才回穩。杜指收市小升24點，報14834點；標普500指數漲7點，造1640點。唔單止美股，歐洲股市亦受到拖累，由升轉跌，其中德國及法國齊跌0.8%。
奧巴馬昨日與國會領袖在白宮開會前表示，對於美國國會通過立法授權軍事打擊敘利亞很有信心，又強調美國的行動將是有限制的，不會重演伊拉克與阿富汗那樣的長期衝突。與此同時，衆議院議長、共和黨人博納也表示，他會支持奧巴馬對敘利亞動武，仲話會敦促國會同僚持同樣立場。有朋友來電話美加電視台不斷播放敘利亞民眾受到類似化武襲擊的片段，睇嚟美國通過對敘利亞動武議案的機會又真係唔細喎。中東戰雲有加厚跡象，紐約期油又即時抽番上每桶108美元，即時嚇到投資者雞飛狗走，唔少資金又流番入金市，黃金又炒番上每安士1400美元上方，最新報1411美元。
大市乏善可陳，不如再講講微軟宣佈以54.4億歐元(約555億港元)收購過氣手機一哥諾基亞(Nokia)的世紀交易。在紐交所掛牌的諾基亞昨日勁升31%，在芬蘭更一度飆升47%，收市仍大漲34%;微軟股價則跌4.5%，係表現最差杜指成份股，剛宣佈收購以1300億美元的價格收購沃達豐集團(Vodafone)45%股份的Verizon亦跌近3%！唔知係唔係人地睇到咁大間諾基亞手機都係值54.4億歐元，即係71.6億美元，Vodafone呢1300億美元作價好似幾貴喎。
市場對諾基亞賣盤的評價已好清楚，諾基亞雖然賤賣手機業務，好處係套現脫身，今後專注搞網絡基建業務。微軟則陷得更深，由搞Window Phone軟件，重注投資搞埋硬件。美股交易員形容此交易係「傻傻聯合」，甚不看好。
睇見諾基亞以54.4億美元賣盤，真係令人感嘆，5年時間，就可以將諾基亞呢間全球手機一哥由天堂打入地獄，可見現代社會生意環境變幻之快，企業應變之難。我在2008年前後有兩個和諾基亞接觸的經驗，令我覺得佢唔係幾掂，但點估都估唔到佢墮崖墮得咁快。第一件事和智能電話開始流行有關，蘋果在2008年出iPhone3，我因生意需要搞手機應用，同時搞蘋果IOS、穀哥Android和諾基亞自家操作系統Symbian三個版本，發覺Symbian好難難搞好麻煩，其他兩個應用搞好哂，Symbian應用都未搞掂，程式人員好多投訴，礙於諾基亞當日還是手機市場一哥，我們還是夾硬搞下去。當時心想，諾基亞最好的選擇是轉用穀哥Android，否則硬要搞Symbian，遲早搞死佢自己。
第二件事係雙咭機，當時中港雙咭機大行其道，獨係諾基亞呢個一哥無雙咭機，我見到諾基亞香港高層提起呢件事，佢嘆口氣話同總公司提過遲遲未批。我當時感覺是諾基亞若不是太傲慢，就是太愚蠢，可以這樣我行我素，不理市場變化，不顧客戶不滿。今年回首，可能兩者皆有。當日諾基亞沒有火速放棄Symbian、最終放棄Symbian後沒有跳入穀哥Android而夥拍微軟Window，是兩大相關的錯誤決策，令Nokia陷入萬刧不復之地。
諾基亞5年從高峰滑向穀底，速度快得驚人，公司一兩個決策錯誤，就難以翻身，一沉不起，這個教訓足以令做生意者引以為戒。現代做生意環境變化快得驚人，買股也如是，如今那有一隻股票，可以買咗放低十年八年唔理，佢自動幫你搵錢?
陸羽仁
回應(16) 我想回應
陸羽仁 BLOG 舊文
