金融High Tea——金人收夠籌
2013年10月9日
昨日大市升204點，炒到無嘢好炒開始炒醜股。收市後傳來消息，高盛子公司沽清吉利汽車(175)股份，套現24億港元，市場私語「金人」(Goldman， 高盛英文名的趣譯)一Q沽清吉利，係唔係都覺得個市升到差唔多呢？
高盛子公司Goldman Sachs Principal Investment Area以每股4.10至4.23港元的價格，出售5.8億股吉利股票，配售價較吉利收市價4.41港元，折讓4.1%至7%，高盛沽埋今次後，將不再持有吉利股票。「金人」沽貨之所以惹人談論，皆因佢過去捕捉出貨時機都有番咁上下，最經典係幾次沽工行(1398)，都差唔多係當時近頂位出貨，例如今年5月20日沽清工行套現85.4億港元，一沽完個市即大插一個月，工行最低跌到比高盛沽出價低20%，所以大家一見金人沽貨都窒一窒。
好難食得太盡
不過中環茶友插句口話，金人沽吉利又無摸得咁準，佢去年11月亦沽過6億股吉利，當時每股作價介乎3.3元至3.4元，但沽完大市仲升多3個月，最多升多過金人沽貨價三成，事後孔明話佢沽早咗少少。
我話好難次次都咁準，但金人沽得貨，等如佢收夠籌，吉利由7月低位2.84元升到近日高位4.54元，升咗60%，或者佢仲可以升多啲，但金人睇佢目前個價都去得幾盡，所以沽貨走人。若然信金人，我估手上若有炒得好勁升得幾多的股份，沽番少少獲吓利都唔拘，錢永遠賺唔晒，好難食得太盡。
昨日是內地國慶長假後第一日開市，節前季結銀根較緊，節後人民銀行繼續放水，昨日再以「逆回購」7天期票據放水650億人民幣，人行在國慶前一周在24日放水880億，在26日放水800億，以紓緩緊張銀根，上海銀行同業隔夜拆息順勢回落，昨日早上造3.05厘，比上月23日人行放水前的高位3.815厘，顯著下降。息口回落對內銀、內房股有利，工行升0.7%，手緊的中小內銀更佳，重農行(3618)就大升4%。
內地正在「金九銀十」的內房銷售旺季，大股中國海外(688)漲3.3%，碧桂園(2007)中午公佈，截至9月底合約銷售達到647億人民幣，三個季度已完成原定620億人民幣的全年銷售目標，下午復牌急彈8%。
內房賣樓理想
恒大(3333)售樓亦佳，昨日公佈公司今年9月的合約銷售銷售面積雖按年僅升7%，但銷售金額卻按年大升近三成至105億元人民幣，因為9月銷售平均價按年升21%，即係市好可以抬番高價賣樓。恒大今年首九個月合約銷售金額累計746.5億元人民幣，按年增長27%，對全年達成1000億合約銷售的目標樂觀。
恒大去年末今年初水緊，無派去年末期息，上周公佈突補派每股末期息18仙，俾市場一個驚喜。花旗話，恒大補派息後令股息回報升番上5厘，反映其財務狀況改善。
內房市道向好，國統局上月中公佈，8月內地70大城市住宅樓價上漲城市多達69個，漲幅高的主要集中在一線城市和個別二、三線城市，北京、上海、深圳等三大城市新樓價按年升18%至19%，唯一擔心樓價升得太急會惹來阿爺干預。
講番恒大，雖然有好消息，但隻股好多時月頭升上高位，到月中回吐，所以短炒想買都唔好在月頭高追，等佢由高位回番10%先好買。
陸羽仁
上一頁 下一頁
金融High Tea 舊文
