利差交易平倉
2014/1/27 9:23:10
網誌分類: 經濟
漫長衝擊
美股上個星期真係跌得好勁。上周五美股大插，杜指重挫318點，收15879點，失守16000點大關，係去年6月20日以來最大單日跌幅，全個星期勁跌3.5%，更係2012年5月以來的最大單周跌幅。標普500指數仲差，跌2.1%至1790點，跌穿1800點。
美股跌得咁甘，同前文提過的三大因素打擊，包括中國1月份製造業數據意外萎縮、利差交易(carry trade)及新興市場貨幣匯率大幅下跌影響，特別係後兩者係相關的，影響最大。
新興市場唔好，只要唔係中國呢種用好多原料的國家，可以直接影響到美國能源股、原料股的走勢之外，其他國家的衰運唔一定鬱到美股，講衰啲係「你死你事」，好似97年亞洲金融風暴發生之初，美股全無反應，到98年影響到俄羅斯要債務違約，令美國炒俄國債券利息差的對沖基金長期資本爆煲，美國才有反應。
今次新興市場匯災的傳導體係利差交易(carry trade)，美股市場好多資金來自借日圓來炒作的利差交易(carry trade)，原因是估日圓會不斷跌，利息又極低，所以就借日圓然後沽出換成美元，其中一個方向是去炒美股，假設日圓一年跌3%，已可頂住利息有餘，資金就變成零成本，你話正唔正? 呢種交易最大風險係日圓上升。
上周由阿根廷披索大跌觸發的金融風暴，令大量投資者沽新興市場貨幣和資產避險，所得資金走入日圓、瑞郎和美債等較安全的資產，令日圓兌美元由上周四的1美元兌104日圓跳升至穿102日圓水平，(最新報102.3日圓)，日圓相對美元急升，做咗日圓利差交易的大戶因為沽咗日圓，馬上有巨大虧損，要沽出美股套現美元，攞去買日圓，平日圓淡倉，咁美股自然有難啦。
股市「恐懼指標」VIX指數上周五勁升超過三成至18.14的5個月高位，反映投資者在內憂外患的夾擊下，已經嚇到腳軟，係咁沽貨啦。
新興市場貨幣匯率方面，好多新高興市場經濟此前之所以咁好，唔係實體經濟有改善，而主要係美國狂印鈔票，造成大量熱錢流入炒作所致。現在美國經濟好轉，歐洲經濟回穩，加上聯儲局開始收水，大量熱錢流番去經濟成熟的歐美投資。統計「金磚四國」今年的股市表現，只有印度股市頂得住，中國跌2.9%，俄羅斯跌5.5%，巴西跌6.2%。反映投資者已對新興國家喪失興趣。
而家大家關心新興市場的匯災完未，我估未完，因為聯儲局可能在今年連續不斷減低買債量，甚至以每次開會減100億的手法來收細水喉。頗具影響力的聯儲局觀察家、《華爾街日報》的希爾森拉什(Jon Hilsenrath)最近預測美聯儲官員會在本周三的會議上再次削減購買資産規模。
若然真聯儲局真係不斷減買債量，勢必吸引資金不斷回流美債市場，現時10年期美國國債債息2.8厘左右，要走上4厘才是2008年風暴前的水平，美息仲有好多上升空間，即係新興市場匯價還會續跌去消化消息，或會以爆破形式達致新平穩。
股市不會兩三日就跌曬，跌完會彈吓，但咁搞上半年好難樂觀，唔好太勇好啲。
陸羽仁
回應(2) 我想回應
陸羽仁 BLOG 舊文
