微有災味 睇住嚟炒
2014年01月27日
金融市場風起雲湧，新興市場的貨幣危機終於搞到美股啦，杜指繼上周四下跌175點之後，到上周五再急挫318點，兩日加埋跌咗493點，累計跌3%，即使當調整計都好大力啦。
美股下跌開始時話係因為匯豐的中國採購經理指數(PMI)下跌，但上周五睇真更大程度源於新興國家貨幣匯價和股市急跌。阿根廷披索上周四大跌13%，當日最高急插20%，相當得人驚。到上周五跌勢未止，再跌1.5%，披索收報8.01，以全星期計累挫15%，波及新興市場匯價全線急跌，資金流向日圓、歐羅、瑞郎及美國債市避險，風眼阿根廷已出現1998年亞洲金融風暴那種災情。
阿根廷央行上周四棄守匯價，令披索幣值急跌，新興市場貨幣匯價出現骨牌效應，巴西雷亞爾、南非蘭特、土耳其里拉與俄羅斯盧布全面下跌，多數貶幅超過1%。土耳其里拉跌破2.31後，再創歷史新低；南非蘭特跌到11.0785的六年最低；俄羅斯盧布跌近五年新低，甚至連港元都軟軟哋。
若以過去一年跌幅計，以阿根廷披索與土耳其里拉跌勢最嚴重，阿根廷披索一年累計大插37%，土耳其里拉大跌23%。以一個國家貨幣計，跌20、30%都未止住跌勢，相當恐怖，通脹急升、信貸緊縮是必然結果，金融風暴在這些國家已經燃起。
儲局收水 觸發危機
雖然話一個國家出現金融災難總有本國的問題，但今次新興國爆災的根源在美國的放水與收水。2008年美國爆金融海嘯，好似中年人嚴重腎虧，結果就狂減息兼大放水，就好似狂食補藥那樣，夾硬頂住。呢個中年人唔止自己食補藥，仲隨街派，連住佢旁邊的後生仔都食埋補藥，開頭好過癮，食到好亢奮，但好快已經流鼻血，不少人都知道唔掂，但中年人的免費補藥還是不停派，後生仔不停食，食足6年已經慣晒依賴晒之後，突然宣佈將來不再有補藥派，你話恐唔恐慌？美國經濟太冷，要印鈔加熱，但熱錢走到本身已熱熱哋的新興市場，好易谷出病來。
高盛的基金經理Yacov Arnopolin用另一個方法來描述同一件事情，他說「在2008年金融危機剛過去時，新興市場是投資者的寵兒。當時他們的表現完全掩蓋了美日歐的復甦進程。當時只有一部份國家的領導人，對大量熱錢的湧入表示過不滿，認為它們影響了國內經濟的穩定。現在金融危機過去5年了，大多數新興國家的命運已經明瞭，是時候吞下他們激進政策帶來的苦果了。」
爆得最大的阿根廷，早幾年經歷了熱錢湧入的愉快時刻，如今痛嘗苦果，自去年5月美國聯儲局暗示要退市之後，資金不斷從新興市場流走，經濟基礎薄弱的阿根廷首當其衝，資金流失令匯價不斷下跌，政府用外匯儲備力挺，因為阿根廷經濟依賴進口，要吸引外資流入去支撐經濟，所以匯價急跌會令資金加速外逃，政府唯有用外儲去挺匯價減少資金外流。
阿國危機 一時難救
去年阿根廷中央銀行出售了59億美元的外匯去吸納披索，等如花去17%外匯儲備，令該國外儲降至了7年來的最低的292.6億元。花費大量外儲去頂披索，卻如泥牛入海，即使上周大插後披索官方匯價還有8.01，黑市匯率已跌至了12.85。
阿根廷央行最後明白即使用盡外儲去干預都無用，短期對策只有兩條路，第一條路是實施外匯管制，但以其進口型經濟來說，此舉等如自上絕路。第二條路是讓匯價更自由下跌，期望快點貼近黑市價，即是讓匯價快速尋底，但此舉陣痛亦好大。
外界普遍認為阿根廷對解決危機沒有明確思路，匯價急跌的即時效果是觸發資金進一步外逃，信貸緊縮，通脹急升，已有分析員擔心阿根廷可能出現30至40%通脹。阿根廷問題要根本解決，經濟學家開的王道藥方又係緊縮，國際金融協會首席拉丁美洲經濟學家Ramon Aracena話，「回顧阿根廷前數年的發展歷程可以發現，外匯儲備的不足早已暗示危機到來。現在才貶值披索已經不能解決問題了，阿根廷更需要的是一個全面緊縮的財政及貨幣政策。」問題是全面緊縮十分之痛，阿根廷又忍唔忍得痛呢？
新興國家 仲未爆完
阿根廷這種問題並非獨有，很多新興國家經常帳赤字都十分嚴重，依賴進口，經濟增長脆弱，土耳其、南非、巴西、印度和印尼都有類似問題，在美國逐步收水的前提下，資金外流對她們困擾極大。所以危機絕對有擴散的可能。
你可能問，講咗咁耐阿根廷，同我哋買股票有乜關係？我認為有莫大關係，要對未來中長線投資環境重新評估，主要有幾點︰
首先，爆災可能上升，投資要審慎。過去中南美洲出事與香港無關，阿根廷以前鬧過金融危機香港講都唔講，但如今世界是平的，加上新興國的危機根本和聯儲局收水有關，原因是全球性的，你看美股都有咁大反應，就要小心危機擴散。本周聯儲局再開會，佢上次已將每月放水買債量由850億美元減至750億美元，我估佢本來部署係如無意外每次開會都減量100億美元，固然要睇佢會否因為新興市場危機而縮手(我估縮手機會略低)，若然繼續減少放水量，可能深化新興市場危機。
港股跟美股和A股走，美股一急回已回到一年上升軌的底部，要小心觀察，若美股再大跌，跌穿上升軌，恐怕美股上行走勢已終止，市場風險上升，總之在呢種有可能爆災的市場，投資要審慎，最好的方法是忍手保留多點現金。
應付逆轉 避貴資產
再者，應付逆轉，避貴資產。擔心出現爆泡危機，怕金融風暴再出現，只是表示爆煲的可能性上升，風暴不一定會出現，而且即使出現，也有一個過程，中間甚至有像樣的反彈，好似1997年5月泰國已爆危機，香港到10月才第一跌，跌完在年底開始反彈，到1998年3月後危機才進一步深化。但若你是審慎之人，最佳應對之法是避開貴價資產，樓是一種，樓價回咗少少仍然好貴，一爆災無人承接無得避。另外炒到好癲的股票也是另一種，可以插得好快，跌市時反而收息股係避險工具。
港股現時大跌可能性極低，撈底莫急。去年好多人話今年港股睇27000、28000點，我當時已經唔係太信，估最高26000點，家睇26000點都高，真係25000點差唔多，拉長過去幾年睇25000點係橫行市的頂位，好難升穿，下方去番20000點一啲唔奇，一年5000點上落，仲要假設無巨災出現。家在中間位，下探的空間不少，結論是若你是作一年投資的話，不用太急撈底，怕撈完再插。反過來說若今浪跌到22000點，2月底業績期時大市反彈番上23000點，反而係減點貨的時候，我估美國退市持續，新興市場風暴無咁快完。
第三，小注怡情，永遠無錯。我話呢啲市要少炒，要避開炒股，好似賭股、網股、手機股，呢啲股好多升到好高，在呢啲風暴市我開始對貴股有啲擔心，咁講可能阻人發達，因為即使將來有跌市，呢啲熱炒股跌一跌反彈你買個位好食正都可以賺好多，散戶炒開亦唔想走。咁我就建議仍然想炒的朋友，一係嚴守止蝕，一係控制注碼，若只係放你自己的10%資金放熱炒股，萬一佢咁衰跌70、80%，這部份只令你總資金減少7、8%，仲頂得到呀。
結論係美國咁樣放水史無前例，佢收水時係點亦無人見過，無事又得，爆鑊又得，有人話俾你聽佢知道一定會點，肯定係靠估無痛苦。散戶自己睇住自己盤數，好自為之啦。
陸羽仁
金融High Tea 舊文
