「梁」變熱
2014年01月16日
港股升一日、跌一日，昨日中環茶友話題係特首梁振英宣讀《施政報告》，有人話報告成三萬字，搞出成二百億元的各種措施，林林總總，睇嚟佢好想搞到熱熱鬧鬧，贏番啲掌聲喎。
公交股喪炒《施政》概念
香港股市向來受中國同美國影響大，本地因素反而唔係咁重要，茶友話，雖然係咁，但港府大灑金錢，阿梁都變阿熱，個經濟照計唔會明顯降溫，點都對經濟有好處啩。好似報告宣佈將長者2元乘車優惠將擴至綠色小巴，超級冷門股進智公共交通(077) 頓成《施政報告》受惠股，股價獲大幅炒上，最多升六成八見1.7元，收市仍升五成一報1.53元，不過成交都唔夠500萬元。進智公交小巴生意受鐵路威脅，係咪可以靠政府一招打救仲未知，但股民就先執咗一劑。
有人話，如果係咁睇，仲可以買乜股呢？茶友話，港股多數係向外型企業，多數係賺美國同中國錢，若然講內需，最大就係房地產，如果《施政報告》對經濟有利，就要睇吓地產股有無得借勢反彈嘞。
大家奇怪，阿梁擺明唔係房地產之友，所以你睇佢上台後，樓價未大跌，但地產股好多都同高位比跌咗兩、三成，點解茶友提起地產股呢？佢強調自己絕對唔係睇好地產股中、長線走勢，只不過見到係《施政報告》前夕，地產股企番穩，阿梁昨日話樓市辣招已經收到成效，即係短期再出招機會唔大啦，由於地產股早前跌到都幾殘，有可能會借勢反彈而已。
茶友話，房地產政策係現政府搶民心重點，無可能隨便放鬆，但佢提出的措施好似攞綠色地帶嚟起樓，都要一段時間先至推出市場，而且數量唔會太多。對地產商嚟講，市場需求根本好大，政府推多啲地未必係壞事。
其他措施方面，可以講在在需地，無論要開發大嶼山，到發展地下餐飲，當局提出不同措施包括放鬆工廈活化、補地價仲裁，都係要業主同地產商合作，照計唔應該對地產商係負面消息。如果要炒《施政報告》消息，大路啲買下有農地的恒基地產(012) 或者係大嶼山有地的香港興業(480) ，走番一轉短線囉。昨日茶友一邊聽住《施政報告》，一邊睇住個市。美股連跌四日反彈，輪到內地A股彈一日後就無力再上再跌過。港股好彩地沒有被A股拖垮，恒指及國企指數都有進帳，齊升0.5%至22902點及20202點。但全日成交仍然淡薄，唔夠600億元。
聯想低位彈升7倍
藍籌股升幅榜第一及第二都係科技股，聯想(992) 同騰訊(700) 。騰訊亦見受惠再破頂，最高見509元，收報508.5元，升3%。聯想收市升超過半成至9.96元。
研究機構Gartner的統計報告指出，全球個人電腦去年整體出貨量按年減少10%，單計第四季的出貨量有超過8200萬部，按年倒退6.9%，連續第七個季度錄得倒退。聯想及戴爾係頭五位生產商中，錄得增長的兩間，第四季分別上升6.6%及6.2%。
如果全年計算，就只有聯想出貨量有所增加，增幅有2.1%。有分析預期聯想股今年會持續增長，加上智能手機及平板電腦銷售貢獻持續增加，前景可續看好，股價受到追捧。
聯想表現強勁可以追溯可1999年，當年2月，聯想股價跌到1.44元，之後幾年一路升到昨日，中間停到未停過，累積升幅6.9倍。
陸羽仁
金融High Tea 舊文
