繼續雞肋
2014/2/24 上午 09:43:07
網誌分類: 經濟
大陸一個收水局，壓住香港個市。今日較受注目的是匯控(005)派全年成績表，據外電綜合30家證券行的預測，該行去年稅前盈利預測中位數為246億美元(約1908億港元)，按年升19%；純利則為178.6億美元，升27%。
英國《每日郵報》昨引述消息指，預期匯控今天公布的盈利將錄得破紀錄的246億美元，主因英國按揭業務強勁，刺激盈利增長。
除了英國按揭業務好番之外，撥備減少亦有幫助。當然，最大的增加盈利因素還是靠節支而來。以去年首三季度計，滙控收入按年跌3.9%，但支出減幅更多達11.1%，變相獲得淨增長。但利息低企，監管要求日高，都約策住匯控的盈利增長。
你可能會問，又話匯控盈利將創新高，為何現價得番84元，和97年高位142元差咁遠? 理由有兩大個，第一，匯控在金融海嘯時大量供股發了好多新股，溝淡了盈利，若不以盈利總數計，以每股盈利計，而家遠不到每股盈利創新高水平。第二，匯控增加盈利不是靠收入增加，是靠節省而來，市場會認為呢種盈利質素無咁好。你睇匯控在2011年公佈三年營運策略的滙控(005)，其策略目標，市場最着重的是滙控的、股本回報率、收入開支比率及持續節省成本等三個目標。現時埋單睇同節省成本相關的第二和三個目標有機達標，距離達標最遠的為股本回報率目標，當年定的目標是12至15%，至去年9月底止只有10.4%，雖然好過一年前的8.9%，但與目標仍有好大差距，主因滙控靠賣嘢、裁員增加收入，沒有新的盈利增長動力。
就因為咁，匯控過去一年又由上升股變番上落股，高位近90元，低位79元，在這中間走動，好多時更是在82和86一個窄幅中間浮，顯示匯控生意無突破，只變成投資界眼中的雞肋，低位買吓，高位即走。除了派4.4厘息較吸引外，其他無乜賣點。
另外講吓美國，美股上周五反覆偏軟，先升後回。杜指跌30點，收16103點，標普500指數跌4點，報1836點，納指跌4點，收報4263點。總結一周，美股未能延續此前一週升勢，杜指及標普500指數分別跌0.3%及0.1%，納指則逆市升0.5%。
上周五，聖路易斯聯儲主席布拉德(James Bullard)就表示，美國今年至今的疲軟經濟數據很有可能是惡劣氣候所致。而天氣因素唔會成為左右貨幣政策的理由，聯儲局「對美國經濟前期非常看好。」故此，聯儲局仍會繼續縮減QE，但投資者無大量走貨，反映投資者又唔係咁驚青。相信係聯儲局俾市場感覺對經濟信心十足。事實上，分析普遍仍然睇好後市，花旗私人銀行全球首席投資策略師維廷(Steven Wieting)表示：「仍然預計美國股市將小幅攀升。預計低利率政策與不斷增長的派息將使美股繼續上揚，但漲幅會顯著小於2013年。」—到目前為止，股市表現好的日子，好多投資者唔想沽貨，股市下跌，又有一定的投資者會撈底。就做成大市跌唔落去的情況。
陸羽仁
回應(3) 我想回應
陸羽仁 BLOG 舊文
