超超……超高危股
2014年02月18日
美股納指上周五創逾十三年新高，推動港股全日升過兩百點，科網股繼續鬥癲遊戲，騰訊(700) 再破頂，未上市的阿里巴巴，市場繼續炒影子股中信21世紀(241) ，而且愛屋及烏，搞到連隔籬個名有啲相似的21控股(1003) 都狂升。21控股主席係吳啟民，公司業務係從事提供物業代理及相關服務、玩具、贈品、精品買賣，以及證券買賣及投資。
自從佢入主公司後，已經多番抽水，通常係先合股，後供股，合完股之後股價大跌，大跌後又合股，之後又大比例供股，循環不息，係過去十年最具驚嚇性的散戶殺手股，有中環茶友曾經「領嘢」，供過兩次股之後唔肯再「落疊」，點知放喺倉的股票不斷縮水，家市值跌到得番幾十元，沽出去要輸手續費，睇到就眼冤。
炒錯隔籬可以輸死
隻股昨日咁炒法，一係有人博懵炒佢個名同中信世紀21相似，一係就炒賣股潮。若然係前者，肯定係超超……超高危動作，因為唔止會輸咗落注的錢，萬一夾住就可能被迫供股，隨時輸突；若然係炒後者，就希望小股東好運可以成事。茶友好唏噓咁話，自己恨錯難返，相信已無望返家鄉。
對於呢啲高危抽水股，佢已鐵了心採取四不策略，即係不買、不賣、不供股、不加注，話之佢搞邊科。如果有人落場坐順風車者，最好就留意吓公司背景，有齊「四不」準備然後落場。
講番炒得火紅的騰訊和中信21世紀，好明顯係大家鬥掟彎搶位。騰訊步大力雄，價位係港股之冠，早已經唔係散戶的一杯茶，阿里巴巴未曾上市，先入主中信21世紀滿足吓大家的炒賣欲。
阿里同佢行埋之初，已經有評論話以阿里身價近萬億元計，無可能會借殼，令到股價跌一跌，但咁樣似乎無影響佢作為替身的炒賣概念，股價同交投齊飆，今鋪炒起，係傳話阿里有意把醫療撥畀佢負責咁話。
阿里未上市前，已經動作多多，喺美國搞東搞西，喺咁環境下，中信21世紀畀人聯想空間好大，加上市值細，睇嚟係阿里上市明朗前，又或者管理層明言無嘢無益佢，呢隻股都會成為炒家樂園。
大市昨日消息唔少同科網有關，騰訊傳斥31億收購內地版開飯啦(OpenRice)的「大眾點評」，刺激其股價再破頂創新高，全日收報580元，揚31.5元或5.74%。
炒科網樂此不疲
金山(3888) 旗下引入小米共拓手遊業務，股價升6.58%，報25.9元；中信21世紀股價抽升兩成，重返4元大關上，全日收報4.12元，大升25%。中午公佈料去年經調整純利錄得可觀增長的博雅(434) ，股價午後大幅攀升，全日收報13.36元，抽升20%；IGG(8002) 股價都升17%，收報9.64元；雲遊(484) 飆6%已經算少。
手機股同樣精采，小米香港在港開售一萬部紅米手機，僅30秒已經售罄，小米零件供應商通達(698) 爆升0.1元或12%。
大市畀科網概念搶晒鏡，其他板塊好啲係內險股，受惠上月保費收入按年增長73%，國壽(2628) 持續攀升，升幅更是藍籌最勁，收報22.85元，飆6%。
恒指全日收報22535，升237點；國企指數收報10101，升167點，成交金額由上周五的556.8億元，增加至603億元。
陸羽仁
金融High Tea 舊文
