魚樂無窮：誰會再管恒指升定跌 - 唐牛
■經過起碼兩年炒股不炒市嘅日子，已經冇乜人再理恒指升跌，恒指作為港股指標嘅作用亦越嚟越細。
噚日開筆寫欄，心裡突然浮現一個問題︰「究竟今日(噚日)恒指升定跌？」無錯，經過起碼兩年炒股不炒市嘅日子，已經冇乜人再理恒指升跌，恒指作為港股指標嘅作用亦越嚟越細。噚日問過戰友，超過一半都唔知個市升跌，仲要抽兩句水︰「而家淨係睇騰訊(700)升定跌囉」、「炒大股嘅散戶變曬艇戶啦！」
恒指陷入半昏迷mode，多得紅色勢力成功入侵。現時恒指成份股當中，中字頭佔半壁江山，近年滬綜指衰到貼地，同聲同氣嘅恒指又點會有運行呢？幸好港股個別板塊炒風，好似內地創業板咁強勁，否則散戶唔使睇TVB膠劇，都隨時瞓得著。
曾幾何時，恒指黃金/死亡交叉(50日線升/跌穿250日線)主宰後市牛熊，乃股壇大新聞，財經報章雜誌無不大肆報道，但近年指數冇升幅兼且小波幅，移動平均線作用大不如前，往往出現今日牛市明日熊市現象，恒指剛於上周五出現死亡交叉，唐牛翻查紀錄，翌日只有四份報章提及，受重視程度可想而知。
發完牢騷，都要講下是日推介。民生國際(938)2月提過要分拆珍珠珠寶產品業務上市，曾經出現一輪炒作，其後轉趨平靜，噚日突然抽升8%，話唔定分拆好事近，假若突破下降軌阻力0.6元水平，不妨小注追入，反彈目標先睇0.8元。
唐牛
上一則: 博弈穿雲：中動向食正阿里概念 - 俞亮
下一則: 股場放大鏡：文化中國爆發力更強 - 歐陽風
魚樂無窮 - 唐牛 舊文
