中環在線：福臨門富豪常客最憎高踭鞋女員工須換拖鞋「滅聲」 - 李華華
■設計圖片
好多人都有獨特嘅癖好，有錢人當然唔會例外。聽聞，城中有一位經常去福臨門食飯嘅富豪，最憎聽到女士著住高踭鞋走路時發出嘅「騎呢格嘞」聲，所以要求女同事喺寫字樓換上拖鞋，一律唔准著高踭鞋走來走去。
平日見到呢位城中富豪，冇乜人會發現佢有特別習慣，佢對住街外人嘅時候係十分正常，但原來佢對聲音相當敏感，喺佢公司返工嘅員工，平時喺寫字樓說話要十分細聲。
有潔癖唔准貼埋牆
最特別係，佢公司用木地板，女員工返到寫字樓唔准著高踭鞋，要立即換上拖鞋，拖鞋係乜嘢款式，就冇乜特別要求，總之走起路上來唔可以有聲。可以想像，上到呢位富豪寫字樓，真係連蒼蠅飛過都聽到。
不過就唔係人人都要換鞋，如果有賓架或者生意夥伴走上佢公司傾生意，就唔使換鞋，可能呢位富豪擔心對方除鞋後，發出異味就更難頂啩。事關佢除咗鍾意靜英英，好似仲有些少潔癖，例如，會規定員工嘅身體唔准貼埋牆，少少都唔得，怕整汙糟牆身。
佢食飯就更加講究，要不停咁換新碗碟。據聞，有次佢同一大班人食飯，有一位女士坐喺佢旁邊，想幫佢遞走一隻用過嘅碟時，唔小心揩到佢隻衫袖，整汙糟咗少少，就當場被佢鬧到狗血淋頭。
其實唔止呢位富豪先有特別喜好，好耐之前都講過，市場傳聞，思捷(330)前主席邢李㷧鍾意女仔外表簡潔清爽，幫佢打工嘅長髮女同事多數會自動自覺紮起辮仔，或者保持一頭短髮。
李華華
mailto:LiWaWa@AppleDaily.com
上一則: 國策解碼：中央打老虎電力股恐震盪
下一則: 中環在線：李業廣梁志堅置地避雨開餐 - 李華華
中環在線 - 李華華 舊文
