一周三件：泛店價殘超值 - 錢雋
■筆者分析指，泛海酒店街貨少，股價又殘，好易舞上。
富豪國際(078)由3月尾到家陣已經升咗25%，跑贏大市。但今日主打唔係富豪，而係佢揸住7%權益嘅泛海酒店(292)。後邊泛店得0.15倍PB，彈到上富豪0.3倍PB水位，已經好肥仔。
升幅落後同系
泛店單係去到上年9月嘅NAV，上到6.23元，現價(0.91元)大大幅折讓85%，或0.15倍PB。泛店家陣揸住灣仔、銅鑼灣同尖沙嘴三間皇悅酒店，自由行大旺，加埋三間酒店位置超級靚仔，有價有市兼享受大升值。
再講，泛店揸住歐美證券，單係去到上年9月底半年內，呢批股票已經升值22%到近5億銀，形成PB同股價再擴闊。
又泛店一門三傑，泛海集團(129)對上一年升咗40%，旗艦滙漢控股(214)，到今個月頭，更加累升60%，泛店同期升得30%，升幅落後一截，搞到PB仲係咁低殘。又泛店唔係地產股，無受到辣招嘅影響。兼好似上邊講，單係自由行同歐美keep住低息嘅大好形勢，泛店嚟自酒店同證券資產嘅升值潛力，應該叻過對上嘅泛海及滙漢。而泛店股價仲咁殘，更加唔合理。
上年7月，富豪喺泛店嘅權益曝光，揸咗泛店7%或1.09億股。外行睇內行，或者有偏差，但富豪掌舵羅旭瑞係行內老手，而佢呢次出手，以NAV一折幾價錢投資泛店，超超超值。
又連埋泛海揸住泛店73.08%權益，泛店街貨權益得20%，等值2.5億銀咁大把。對上泛海街貨市值過9億銀，滙漢近3.4億銀。泛店係一門三傑內最少街貨市值，乾曬塘。隨住對上兩隻股先後大升，泛店係等鬱。
冷灶煲泛店，PB輕輕收窄到富豪0.35倍水位，都要見2.2元，泛店現價係要升1.4倍，仲唔肥仔水？
錢雋
細價股專家
本欄逢周二、三、五刊出
上一則: 投資學堂：AH差價陷阱 - 譚紹興
下一則: 滙海探戈：歐元強勢背後的迷思 - 奇兵
~TITLE_S~一周兩件 - 錢雋 2014年4月25日 舊文
