打虎市
2014年04月25日
市場噚日關注大型國企放榜，加上觀望美國周四公佈上月耐用品定單，以揣測聯儲局退市去向，投資者入市態度明顯審慎，港股好淡爭持。恒生指數高開18點後掉頭，一度倒跌48點低見22461點。隨後沽盤收斂，大市漸漸企穩，之後大部份時間在20天線(22548) 上下穿梭，恒生指數收報22562點，升53點，高低波幅只有114點；國企指數收報9940點，升35點，成交金額503億元。
CEC港視合作有排煲
內地有報道指，中央計劃設立1200億元人民幣芯片扶持基金，扶持集成電路產業。受消息刺激，中芯(981) 炒高9.84%，收報0.67元；晶門(2878) 爆升16.67%，報0.42元；先進半導體(3355) 揚4.23%，報0.37元。半導體設備生產商ASM(522) ，首季純利大升18.7倍至1.57億元，股價升1.91%，報82.8元。
噚日另一大焦點，就係「魔童」王維基同CEC(759) 主席林偉駿見面，市場即時憧憬CEC旗下阿信屋會同魔童旗下香港電視(1137) 合作，籌備本港首個24小時購物頻道，CEC爆升17.94%報2.63元；但香港電視則僅升0.86%報2.35元。CEC可謂搭咗一程「免費概念順風車」，所以爆升，不過呢味嘢就算唔係無米粥，都有排煲，所以短炒要識落車。
假後外圍升勢唔錯，但內地個市走勢麻麻，港股受內地影響較大，跟弱唔跟強，美股升恒指無反彈，A股跌香港就跟咗佢跌落去，好彩係至今為止，跌幅唔算多。昨日就反彈53點，恒指收22562點。
內地股市軟軟哋拖低香港，中環茶友各自解讀。有茶友按正路解釋，內地最近的經濟數字差，反映增長唔夠勁，加上人民幣貶值，不利借咗外債的企業，最重要係阻止外資流入，甚至把資金驅離內地，所以見到呢兩日，都係內險、內銀跌得多啲。不過阿爺早前拋咗國企注資同港滬通兩大政策出台，個市有憧憬，所以仲頂得下。
就業不差 放水力細
茶友話，市場本來相信數據唔靚仔，管理層可能會停止收水，甚至放水，不過，最近佢去過北京同人傾起，發覺政府觀測經濟同政策的指標，已經由過去注重增長率，改為睇就業多啲。
以前，內地增長有保八的說法，理據就是有8%以上的經濟增長，就可以創造足夠的工作機會給投入社會的新勞動力。現屆政府上場後，就唔再堅持保八，同時將增長同數字分開嚟睇。
今年第一季，內地增長有7.4%，通脹率維持2.5%，據講期內創造的職位有300萬個，同去年創職的平均數相去不遠。呢啲數字睇嚟唔係咁差，聽聞中央領導層對經濟表現仲有幾從容吓，所以最近幾個數據唔靚仔，但唔聽到有乜大力放水的說法。
聽完茶友咁正路嘅分析，座中有位包拗頸又話自己另有睇法。包拗頸話，中國儲埋幾十年改革老本，而且仲係行緊社會主義，政府揸住大把資源在手，經濟好啲差啲，中央仲有好多空間可以做嘢，數據差小小，衰極都有個譜啦，又邊使咁緊張喎！大家家最睇唔通者，係個打虎市會點走。
包拗頸話，中央家反貪倡廉，老虎蒼蠅一齊打，大小官吏不准吃喝奢侈事小，黨政幹部下馬，短期衝擊就要時間消化，家內地幾宗大案未了，又話仲有幾宗查緊。同香港關係大一點的華潤老闆宋林又中伏，國企老總人人自危。
佢仲口爽爽大大聲講，你唔發覺呢排個市弱弱哋，都係中資股帶頭，佢哋跌未必係公司有事，可能係炒佢班友無心機。喺呢啲老虎又打、蒼蠅又打的時局下，炒賣搵銀已經唔再係佢哋最上心的事，咁自然影響咗股市氣氛。從過去鐵路部，石油部案例，查完之後換咗管理層，公司就會穩定番，反正央企係國家資產，領導人唔會徹底整死佢，但在調查期間，公司點都有啲唔穩定，加理風聲咁緊，係呢個係「打虎市」，內地熱錢都可能炒少兩轉，呢樣嘢可能仲直接過講乜數據差啦！我覺得大市早前升得多，在正常調整中，你睇隻恒生H股基金(2828) 一個月高位106.4元，家回番到99.75元，回咗6%左右，回深少少進入射程，望佢跌深少少可以分段吸。
陸羽仁
金融High Tea 舊文
