中環在線：笑稱港交所冇錢請人表演李小加跳舞娛賓 - 李華華
■晚宴大部份男士都打黑色煲呔，惟獨唐家成打紅領呔，唔通想搶鏡？羅君豪攝
港交所(388)買起倫敦金屬交易所(LME)後，噚日第二年舉行LME亞洲年會，日頭有一連串研討會，重頭戲當然係晚上嘅black tie dinner，事關行政總裁李小加會上台表演，佢舊年扮碧咸講棟篤笑，今年就著踢死兔跳舞兩分鐘，仲講笑話因為冇錢請人娛賓，惟有自己粉墨登場。
■李小加跳舞有姿勢，成為全晚高潮。
筵開125席周松崗冇到
噚晚晚宴以占士邦做主題，現場仲有一幅李小加舉起隻杯扮占士邦嘅廣告板，上面唔係印住007，而係港交所嘅股票編號388。
話明係black tie dinner，大會要求大家著晚禮服赴宴，民族服裝都可以。大部份男士都打煲呔著禮服，有份主禮嘅財經事務及庫務局局長陳家強、LME行政總裁莊敬賢當然唔例外，但證監會主席唐家成唔知點解著得相對較hea，似係開完會冇時間換衫就趕去。
李小加笑說冇錢請人娛賓，實情係晚宴節目豐富，入席前有黑絲舞蹈員跳舞，之後有人跳影子舞，並有歌手唱咗兩首占士邦電影主題曲，最後由李小加與幾位著中國服嘅舞蹈員跳舞，李小加嘅舞步如何就見仁見智喇，形容佢係「跟住un」都可以嘅。
不過，李小加確係好有叫座力，噚晚筵開125席，超過1,500人出席，舊年只係800人左右，今年多咗九成，都幾誇張。可惜，主席周松崗有事離港，無緣欣賞李小加表演。
李華華
mailto:LiWaWa@AppleDaily.com
■李小加扮占士邦嘅廣告板，上面係港交所嘅股票編號388。
■創銀副主席梁高美懿盛裝赴會，成身閃令令。
上一則: 樂香園：芬佬回報唔一定好 - 密西比
下一則: 中環在線：藝術品循環展出恒地物盡其用 - 李華華
中環在線 - 李華華 舊文
