中環在線：地產商員工享另類假期設關懷義工考試假 - 李華華
■個別本港地產商會為員工提供一啲特別名堂嘅假期，好似關懷假同義工假。
寫字樓打工仔呢個月應該感覺幾爽，事關由本月中至5月第二個星期，每個星期都有一日公眾假期，大家可以返少一日工，中間請一兩日假又可以當長假放，仲唔係好爽？講開假期，原來個別本港地產商會為員工提供一啲特別名堂嘅假期，好似新世界發展(017)員工呢個月開始就每年有一日「關懷假」。
做10小時義工有兩日假
關懷假其實係新世界畀員工每年有一日假，用作陪家屬睇醫生，主要方便員工陪年老多病嘅爸媽覆診之類，亦可以分拆兩個半日去用，員工申請呢種假都要提供醫生證明嘅。
其他地產商亦有提供特別假期，舉例說，恒隆地產(101)與太古地產(1972)有「義工假」，恒隆員工為認可機構做義工，每年有一日義工假，太地員工為旗下義工隊做夠10小時義工服務就有兩日義工假，藉此鼓勵員工多做義工。
此外，新世界與新鴻基地產(016)分別每年提供3日與1日「考試假」，員工有需要參加考試就可以申請，新地可以視乎情況畀員工請多過一日。
新地恒地仍是長短周
唔講唔知，新世界亦有一日叫做「生日假」，員工喺當月生日就可以額外申請一日假。
其實最實際咁惠及員工就係推行五天工作，暫時唔係所有本港發展商都係五天工作，新世界、太地、恒隆就推行多年，新地、恒地仲係要求員工返五天半、長短周制度。
新地大股東郭氏兄弟與恒地老闆李兆基係世交，如果其中一間改，大概另一間都會跟住改，可惜暫時兩邊都冇乜聲氣，員工要繼續等喇。
李華華
mailto:LiWaWa@AppleDaily.com
上一則: 樂香園：華創屋漏逢夜雨 - 密西比
下一則: 中環在線：周福安開齋拉頭馬 - 李華華
中環在線 - 李華華 舊文
